باس پروكۋراتۋرا پرەزيدەنت قاسىم-جومارت توقايەۆتىڭ تاپسىرماسى بويىنشا ەلدە ورىن العان تارتىپسىزدىكتەردىڭ بارلىق سەبەپتەرى مەن ەگجەي-تەگجەيلەرىن انىقتاۋ ءۇشىن جۇمىس جۇرگىزىلىپ جاتقانىن حابارلادى.

"بۇگىندە تەرگەۋ-جەدەل توپتار 494 قىلمىستىق ءىستى تەرگەپ جاتىر. ونىڭ ىشىندە 44ء-ى تەرروريزم اكتىسى، 34ء-ى جاپپاي تارتىپسىزدىك جانە 15ء-ى كىسى ءولتىرۋ فاكتىسى" دەلىنگەن حابارلامادا.

توتەنشە جاعداي كەزىندە جاسالعان قۇقىق بۇزۋشىلىقتار بويىنشا اكىمشىلىك ءىس قوزعاۋ تۋرالى 6966 حاتتاما تولتىرىلعان.

"4918 ادام اكىمشىلىك جاۋاپكەرشىلىككە تارتىلدى، ونىڭ ىشىندە 1978 ادام قاماۋعا الىندى. 791 ادامعا ايىپپۇل سالىنىپ، 2149 ادامعا ەسكەرتۋ جاسالدى" دەپ حابارلادى پروكۋراتۋرا.

قىلمىس جاسادى دەگەن كۇدىكپەن 524 ادام ۋاقىتشا ۇستاۋ يزولياتورلارىنا قامالعان. سوت سانكسياسىمەن 412 ادام قاماۋعا الىندى.

2 قاڭتاردا ماڭعىستاۋ  وبلىسىنىڭ تۇرعىندارى سۇيىتىلعان گازدىڭ قىمباتتاۋىنا بايلانىستى ميتينگكە شىعىپ، ۇزاماي ەلدىڭ وزگە وڭىرلەرىندە دە حالىق نارازىلىعى وتكەن. بەيبىت ميتينگ تۇرىندە باستالعان نارازىلىق شارالارىنىڭ سوڭى جاپپاي تارتىپسىزدىككە ۇلاسقان. سونىڭ سالدارىنان الماتى، تالدىقورعان قالالارى قاتتى زارداپ شەكتى. تارتىپسىزدىكتەر كەزىندە اكىمدىك عيماراتى ورتەندى، پرەزيدەنت رەزيدەنسياسى باسىپ الىندى. دۇكەندەر، ساۋدا ورتالىقتارى، بانك كەڭسەلەرى مەن بانكوماتتار تونالدى.

نارازىلىق كەزىندە زارداپ شەككەندەر، ادام شىعىنى بولعان وقيعالاردىڭ جالپى سانى جاريالانبادى.