ءبىلىم جانە عىلىم مينيسترلىگى ستۋدەنتتەر كوكتەمگى سەمەستردە ءداستۇرلى/ارالاس فورماتتا وقيتىنىن مالىمدەدى.
"ستۋدەنتتەر ءۇشىن كوكتەمگى سەمەستر 24 قاڭتاردا باستالادى. وقۋ ءداستۇرلى/ارالاس فورماتتا بولادى. جوعارى وقۋ ورنىنىڭ شەشىمى بويىنشا وقۋ پروسەسى تولىعىمەن ءداستۇرلى فورماتتا نەمەسە ارالاس فورماتتا ۇيىمداستىرىلۋى مۇمكىن، ياعني دارىستەر – ونلاين، ال پراكتيكالىق جانە سەمينار/زەرتحانالىق ساباقتار – وففلاين رەجيمدە وتەدى" دەلىنگەن مينيسترلىك تاراتقان حابارلامادا.
ال، باسقا قالادان كەلەتىن ستۋدەنتتەر ستۋدەنتتەر ۇيىنە نەمەسە جاتاقحانالارعا ورنالاستىرىلادى.
"وڭىردە تۇراقسىز ەپيدەميولوگيالىق جاعداي تۋىنداعان جاعدايدا، 7 اقپانعا دەيىن (نەمەسە ءتيىستى ءوڭىردىڭ باس سانيتارلىق دارىگەرى بەلگىلەگەن باسقا دا كۇندەر) جوعارى وقۋ ورىندارى ونلاين رەجيمىندە وقىتۋدى باستاپ، ودان كەيىن ءداستۇرلى/ارالاس وقىتۋ فورماتىنا اۋىسا الادى" دەلىنگەن حابارلامادا.
سونداي-اق، مينيسترلىكپەن كەلىسە وتىرىپ، 1 كۋرس ستۋدەنتتەرىنە وقۋ پروسەسىن ونلاين فورماتتا ۇيىمداستىرۋعا رۇقسات ەتىلەدى.
ايتا كەتەيىك، بۇگىن ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم كوميتەتى ءتورايىمى گۇلميرا كاريموۆا ەپيدجاعدايدىڭ كۇردەلەنە تۇسۋىنە بايلانىستى نۇر-سۇلتان، الماتى جانە شىمكەنت قالاسىندا وقۋشىلار ءۇشىنشى توقساندى ونلاين فورماتتا باستاعانىن مالىمدەدى.
پىكىر قالدىرۋ