ەكس-پرەزيدەنت نۇرسۇلتان نازاربايەۆتىڭ ۇلكەن قىزى داريعا نازاربايەۆا ءماجىلىس دەپۋتاتىنىڭ مانداتىن بوساتۋ تۋرالى ءوتىنىش بەرگەن جوق. بۇل تۋرالى كازتاگ اقپارات اگەنتتىگى حابارلادى.

11 قاڭتاردا داريعا نازاربايەۆا ناۋقاستانۋىنا بايلانىستى ءماجىلىس وتىرىسىنا قاتىسپاعان بولاتىن. كەيىننەن جەلىدە ونىڭ جاقىن ارادا وتستاۆكاعا كەتۋى مۇمكىن ەكەنىن تۋرالى اقپارات تاراعان. زاڭ بويىنشا "اۋرۋىنا بايلانىستى دەمالىستا" بولعان كەزدە جۇمىستان شىعارىلمايدى. 

ەلدەگى جاپپاي تارتىپسىزدىككە ۇلاسقان حالىق نارازىلىعى كەزىندە قاۋىپسىزدىك كەڭەسى پرەزيدەنتكە وتكەلى قازاقستاننىڭ ەكس-پرەزيدەنتى نۇرسۇلتان نازاربايەۆتىڭ جاقىن ادامدارى قىزمەتتەن شەتتەتىلىپ جاتىر.

بۇگىن نازاربايەۆتىڭ ءبىر كۇيەۋ بالاسى تيمۋر قۇلىبايەۆ "اتامەكەن" ۇلتتىق كاسىپكەرلەر پالاتاسى ءتوراعاسى قىزمەتىنەن كەتتى.

سونداي-اق بۇگىن پرەزيدەنت قاسىم-جومارت توقايەۆ نازاربايەۆتىڭ تۋىسى سامات ءابىشتى ۇقك ءتوراعاسىنىڭ ءبىرىنشى ورىنباسارى قىزمەتىنەن بوساتتى.

15 قاڭتاردا نازاربايەۆتىڭ ەكى كۇيەۋ بالاسى – "قازترانسويل" اق باسقارما ءتوراعاسى ديماش دوسانوۆ پەن "قازترانسگاز" ۇك" اق باسقارما ءتوراعاسى قايرات شارىپبايەۆ قىزمەتتەرىنەن بوساتىلعان.

ديماش دوسانوۆ – قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ كىشى قىزى ءاليا نازاربايەۆانىڭ، ال قايرات شارىپبايەۆ – ۇلكەن قىزى داريعا نازاربايەۆانىڭ كۇيەۋى.