ەۋرازيالىق ەكونوميكالىق وداقتىڭ ءبىرىڭعاي ەنەرگەتيكالىق جۇيەسىن قۇرۋ كەزىندە قازاقستاننىڭ مۇددەسى ەسكەرىلۋى كەرەك. بۇل تۋرالى بۇگىن ءماجىلىس ءتوراعاسى نۇرلان نىعماتۋلين جالپى وتىرىستا ايتتى. 

2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا (ەۋرازيالىق ەكونوميكالىق وداقتىڭ ورتاق ەلەكتر ەنەرگەتيكالىق نارىعىن قالىپتاستىرۋ بولىگىندە) وزگەرىستەر ەنگىزۋ تۋرالى حاتتامانى راتيفيكاسيالاۋ تۋرالى زاڭ جوباسىنىڭ ماقساتى – ەلەكتر ەنەرگياسىن وندىرۋشىلەر مەن تۇتىنۋشىلاردىڭ ۇلتتىق ەلەكتر ەنەرگياسى نارىقتارىن ينتەگراسيالاۋ ارقىلى ەۋرازيالىق ەكونوميكالىق وداقتىڭ ورتاق ەلەكتر ەنەرگەتيكالىق نارىعىن قۇرۋ بولىپ تابىلادى.

نۇرلان نىعماتۋلين اتاپ وتكەندەي، بۇل زاڭ جوباسىنىڭ قابىلدانۋىمەن ءبىرتۇتاس ءىرى ەنەرگەتيكالىق جۇيەگە ينتەگراسيالانۋ ءۇشىن قۇقىقتىق نەگىز قۇرىلۋدا. ەلەكتر ەنەرگياسىن جەتكىزۋدىڭ ەلارالىق قۇرىلىمىن قالىپتاستىرۋعا قۋاتتاردىڭ، بازالىق ينفراقۇرىلىمنىڭ، سونداي-اق ەاەو مەملەكەتتەرىنىڭ ەلەكتر ەنەرگەتيكالىق جۇيەلەرىنە ورتاق تەحنيكالىق ستاندارتتارىنىڭ بولۋى ىقپال ەتەدى.

ءماجىلىس ءتوراعاسى زاڭ جوباسىن ازىرلەۋشى ەنەرگەتيكا مينيسترلىگىنىڭ نازارىن ورتاق نارىققا قاتىسۋشىلاردىڭ ءوزارا قارىم-قاتىناسىنا قاتىستى ەرەجەلەردى قۇرۋدىڭ ماڭىزدىلىعىنا اۋدارا وتىردى.

– ءبىرىڭعاي ەنەرگيا جۇيەسىن قۇرۋ ول، ارينە، كەرەك نارسە. وعان ەشقانداي كۇمان جوق. ول – باسەكەگە قابىلەتتى ارتتىرۋ ءۇشىن كەرەك. ول، جالپى، وسى سەكتوردى دامىتۋعا جول اشادى ءبىراق تا، وسى، ءبىرىڭعاي ەنەرگيا جۇيەسىن قۇرعاندا، ەڭ باستىسى، ءوز ەلىمىزدىڭ ەنەرگەتيكالىق تاۋەلسىزدىگىن ساقتاپ قالۋىمىز كەرەك. ول، وتە مانىزدى ماسەلە، – دەدى ول.

بۇل رەتتە نۇرلان نىعماتۋلين ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتۋ ماسەلەلەرى جەكە ەنەرگەتيكالىق قۋاتتاردى دامىتۋدى تالاپ ەتەتىنىن اتاپ ءوتتى. وسىعان بايلانىستى ەنەرگيا كوزدەرىنە تولىق تەحنيكالىق اۋديت جۇرگىزىپ، ەلىمىزدە 40-50 جىل جانە ودان دا كوپ جۇمىس ىستەپ تۇرعان نەگىزگى ءوندىرۋشى قۋاتتاردى جاڭعىرتۋ بويىنشا ناقتى ءىس-شارالار جوسپارىن ازىرلەۋ قاجەتتىگىنە نازار اۋداردى.

ءماجىلىستىڭ باسپا ءسوز قىزمەتى