ءانشى سەيت ساۋاتاي 5 قاڭتاردا بەيبىت ميتينگكە شىعىپ، سول كۇنى كەشكە ەكى اياعىنان جاراقاتتانىپ №12 الماتى قالالىق اۋرۋحاناعا تۇسكەن. بىرنەشە كۇن وتكەنەن كەيىن جاراقاتى تولىق جازىلماعانىنا قاراماستان، ونى جاقىندارىنا ەش تۇسىندىرمەستەن پوليسيا بەلگىسىز جاققا الىپ كەتكەن.

تۋىستارى سۇراستىرىپ ءجۇرىپ 17 قاڭتاردا سەيت ساۋاتاي الماتىداعى №18 تەرگەۋ يزولياتورىندا ەكەنىن انىقتاعان.

مەملەكەت تاعايىنداعان ادۆوكاتتى دا تۋىستارى ىزدەپ ءجۇرىپ زورعا تاپقانىن ايتادى.

ادۆوكات سەيت ساۋاتايعا قىلمىستىق كودەكستىڭ 272-بابى 2-تارماعى (شەتەلدىك قارۋلى قاقتىعىستارعا قاتىسۋ) بويىنشا بويىنشا ايىپ تاعىلىپ، 2 ايعا قاماۋعا الىنعانىن جەتكىزگەن.

ءانشىنىڭ جاقىندارى "سەيت قازاق ەلىنىڭ ناعىز جاناشىرى، اندەرىنىڭ كوبىسى پاتريودتىق اندەر. بۇعان دەيىن سوتتى بولماعان، بۇزاقىلىققا ەشقانداي قاتىسى جوق ونەر ادامى رەتىندە ءوزىن كورسەتىپ كەلە جاتقان ازامات. وسىنداي ادال ازاماتىمىزدىڭ، شىن تالانتتىڭ ومىرىنە بالتا شابىلماسا ەكەن" دەپ وتىر.