"سامۇرىق-قازىنا" ءۇاق قوردىڭ جەتى توپ-مەنەدجەرىنىڭ جۇمىستان بوساتىلعانىن حابارلادى. بۇل تۋرالى قوردىڭ باسپا ءسوز قىزمەتى مالىمدەدى.

"مەملەكەت باسشىسى تاپسىرمالارىن ىسكە اسىرۋ بويىنشا ءىس-شارالار جوسپارىنا سايكەس، جازعان ارىزدارىنىڭ نەگىزىندە بۇگىن قىزمەتىنەن بوساتىلدى:

كراۆچەنكو اندرەي نيكولايەۆيچ – قۇقىقتىق سۇيەمەلدەۋ جانە تاۋەكەلدەر جونىندەگى باسقارۋشى ديرەكتور – "سامۇرىق-قازىنا" اق باسقارما مۇشەسى.

مانكەيەۆ مۇحتار ناۋرىزباي ۇلى – "سامۇرىق-قازىنا" اق كورپوراتيۆتىك باسقارۋ جانە الەۋمەتتىك-ەڭبەك قاتىناستارى جونىندەگى باسقارۋشى ديرەكتور.

دۋرماگامبەتوۆ ەرلان دميترييەۆيچ – "سامۇرىق-قازىنا" اق ستراتەگيا، تۇراقتى دامۋ جانە سيفرلىق ترانسفورماسيا جونىندەگى باسقارۋشى ديرەكتور.

تاجيگالييەۆ مۇحتار وتەپقالي ۇلى – "سامۇرىق-قازىنا" اق اكتيۆتەردى باسقارۋ جونىندەگى تەڭ-باسقارۋشى ديرەكتور.

ەسپولوۆ بەكتەنباي تلەكتەس ۇلى – "سامۇرىق-قازىنا" اق قوعام جانە ۇكىمەتپەن بايلانىس جونىندەگى سەرىكتەس باسقارۋشى ديرەكتورى.

تۋسۋپبەكوۆ جاننات راشيد ۇلى – "بىرىككەن حيميالىق كومپانيا" ج ش س باسقارما ءتوراعاسى.

كوجاكوۆ قۋات اسقاربەك ۇلى – "Samruk-Kazyna Trust" كق باس ديرەكتورى" دەلىنگەن حابارلامادا.

قوردىڭ حابارلاۋىنشا، پورتفەلدىك كومپانيالارعا كورپوراتيۆتىك ورتالىق قىزمەتكەرلەرىنىڭ سانىن زاڭ تالاپتارىنا سايكەس ەكى ەسە قىسقارتىپ، وندىرىستىك قىزمەتكەرلەردىڭ جالاقىسىن العاشقى كەزەڭدە ورتاشا سالالىق كورسەتكىشتەرگە دەيىن كوتەرۋ تۋرالى كەڭەس بەرىلدى.

"پورتفەلدىك كومپانيالارعا ساتىپ الۋلارعا جاۋاپتى بارلىق باسشىلاردى زاڭ تالاپتارىنا سايكەس قىزمەتىنەن بوساتىپ، قور توبىنا رەپۋتاسيالىق ءارى جەمقورلىق ءقاۋىپ توندىرەتىن بارلىق قىزمەتكەرلەردى  جۇمىستان بوساتۋ تۋرالى كەڭەس بەرىلدى.

پورتفەلدىك كومپانيالار ءبىرقاتار قىزمەتكەرلەردى قىسقارتاتىنىن جەتكىزدى  ("قازمۇنايگاز" ۇك" اق – 78 ادام، "قازاتومپروم" ۇاك" ۇق – 46 ادام، "قازاقستان تەمىر جولى" ۇك" اق - 32 ادام جانە باسقالار)" دەلىنگەن قور تاراتقان اقپاراتتا.

كەشە سامۇرىق-قازىنا" قىزمەتكەرلەرىنىڭ جارتىسى قىسقارتىلاتىنى حابارلانعان.

21 قاڭتاردا پرەزيدەنت قاسىم-جومارت توقايەۆ قازاقستاننىڭ ءىرى بيزنەسمەندەرىمەن كەزدەسۋىندە "سامۇرىق-قازىنا" قورى جۇمىسىن اشىق جۇرگىزبەيتىنىن، ساتىپ الۋلار جۇيەسى ءتيىمسىز ەكەنىن ايتقان. مەملەكەت باسشىسى ءوز سوزىندە اۋقىمدى جوبالار اياعىنا دەيىن جەتكىزىلمەي جاتقانىن اتاپ ءوتىپ، قورعا تۇبەگەيلى رەفورما جاساۋدى تاپسىرعان. اتالعان ماسەلە بويىنشا پرەزيدەنت الماسادام ساتقالييەۆپەن سويلەسكەنىن، ەگەر ول جۇكتەلگەن مىندەتتى اتقارا الماسا، ءوزى دە، قور دا بىرگە كەتەتىنىن مالىمدەگەن.