دەموكراتيالىق پارتيا قۇرۋ بويىنشا ىنتالى توپ جەتەكشىسى، وپپوزيسيالىق ساياساتكەر جانبولات مامايدى شەكاراشىلار قازاقستاننان شىعارماي قويدى. بۇل تۋرالى ونىڭ ايەلى، جۋرناليست ينگا يمانباي حابارلادى.

جۋرناليست ەمدەلۋ ءۇشىن بىشكەككە بارماق بولعاندارىندا شەكاراشىلار ەلدەن شىعارماي قويعاندارىن، الداعى ۋاقىتتا جانبولات مامايدى قاماۋى مۇمكىن ەكەنىن ايتادى.

"بۇگىن ونى ەش نەگىزسىز بىشكەككە وتكىزبەي قويدى. ءبىز ونىڭ جاراقاتتارىن ەمدەۋگە شىققان ەدىك، سەبەبى، الماتىداعى ءبىر دە ءبىر اۋرۋحاناعا سەنە المايمىز! جاڭا عانا وتادان شىققان ادامداردى پوليسيا قولىنا بەرە سالعان دارىگەرلەر بۇيرىق بولسا نە ىستەمەيدى؟! جانبولات، ءبىز، قاشاننان بەرى ايتىپ كەلەمىز، ەشكىمنەن قورىقپايمىز، ەلدىڭ ىشىندە كۇرەسەمىز! ەشقايدا كەتۋ ويىمىز جوق! شيەتتەي ءۇش بالا مەن قارت اتا-انانى تاستاپ قايدا قاشامىز؟! ەلدى-جەردى قيمايتىنىمىز ءوز الدىنا، بالا-شاعانى تاستاپ قاشپايتىن شىعارمىز! 1-2 كۇن بارلىق مەديسينالىق تەكسەرۋلەرىن جاساپ، ەم-دومىن الىپ، قايتا كەلەر ەدىك. ءبىراق، بيلىك جانبولاتتى ەش نەگىزسىز شەكارادان شىعارماي قويدى. شەكاراداعى جىگىتتەر بارلىق سۇراقتى الماتى قالاسى كريمينالدى پوليسيا دەپارتامەنتىنە قويىڭىزدار، سولار شەكتەۋ قويعان دەدى. ادۆوكات رەسمي تۇردە ەش شەكتەۋ جوقتىعىن، بۇل ءىستىڭ زاڭسىز ەكەنىن ايتىپ، پروكۋراتۋراعا شاعىم دايىنداۋدا. كانات تايمەردەنوۆ، رۋستام ابدراحمانوۆ، بۇل نە باسسىزدىق؟!
بەرىك ءۋالي، توقايەۆتىڭ بەيبىت نارازىلار جازالانبايدى دەگەنى قايدا؟!
ابزال قۇسپان، كاريننىڭ قوعاممەن سىزدەر ارقىلى ديالوگ ورناتىپ، زاڭسىزدىقتى توقتاتۋ ارەكەتى وسى ما؟!
Elvira Azimova، ءسىز ەۋروپارلامەنتتە زاڭسىزدىققا جول بەرمەيتىنىڭىزدى ايتىپ، اقتالدىڭىز. ال مىنا جاعدايعا نە ايتاسىز؟!" دەيدى جۋرناليست جەلىدەگى جازباسىندا.

5 قاڭتار كۇنى الماتىداعى تارتىپسىزدىكتەر كەزىندە الدەكىمدەر جانبولات مامايدى سوققىعا جىققان.

20 قاڭتاردا جانبولات ماماي پوليسيا ءوزىن "جاپپاي تارتىپسىزدىكتەر ۇيىمداستىردى" دەگەن ايىپ بويىنشا تەرگەۋگە العالى جاتقانىن ءمالىم ەتكەن.

"الماتى پوليسياسىنان تەرگەۋدەن شىقتىم. 272-باپ بويىنشا (جاپپاي تارتىپسىزدىكتەر ۇيىمداستىرۋ) تەكسەرۋگە الماق. بۇگىن قورعاۋشىمنىڭ دەنساۋلىعىنا بايلانىستى تەرگەۋ كەيىنگە قالدىرىلدى. "ءسىزدىڭ جاپپاي تارتىپسىزدىكتەردى ۇيىمداستىرعاندارمەن بايلانىسىڭىز بار-جوعىن تەكسەرەمىز" دەگەندى ايتتى. بۇل ءىستىڭ ساياسي استارى بولاتىنى انىق. كورەمىز بيلىكتىڭ قانداي قادامعا باراتىنىن" دەگەن بەلسەندى الەۋمەتتىك جەلىدەگى جازباسىندا.