پرەزيدەنت ق.توقايەۆ سىبايلاس جەمقورلىققا قارسى ءىس-قيمىل ماسەلەلەرى جونىندەگى كەڭەستە جەمقورلىقتى جويۋ باعىتىنداعى ءبىرقاتار شارالاردى تانىستىردى.
– ەلىمىزدىڭ قۇقىقتىق جۇيەسى ءۇشىن مۇلدە جاڭا ينستيتۋتتار بار. مەملەكەتتىك قىزمەتشىلەردىڭ جىلجىمايتىن مۇلىك، اۆتوكولىك جانە باسقا دا قىمبات دۇنيەلەر ساتىپ الۋى قاتاڭ باقىلاۋعا الىنادى. سونىمەن قاتار، شەنەۋنىكتەردىڭ ادالدىعىن تەكسەرۋگە ارنالعان "Integrity check" (تەكسەرۋ ءادىسى) ءادىسىن اتاپ وتۋگە بولادى. ارينە، بۇل ۇسىنىستى ءالى دە جان-جاقتى پىسىقتاۋ قاجەت. دەگەنمەن، حالىقارالىق تاجىريبەدە مۇنداي تەكسەرىستەر جاقسى ناتيجە كورسەتۋدە. باسقا دا ءبىرقاتار ماڭىزدى شارالاردى جۇزەگە اسىرۋىمىز كەرەك. سوندىقتان، بۇگىن ماعان تانىستىرىلعان تۇجىرىمدامانىڭ جوباسىن بەكىتەمىن. الايدا، جۇمىستىڭ تيىمدىلىگىن ناقتى ناتيجە بويىنشا باعالايتىن بولامىن.
تۇپكى ماقسات – سىبايلاس جەمقورلىقتان تازا قوعام قالىپتاستىرۋ. جەمقورلىقتى جويۋ ءۇشىن وعان بۇكىل ەل بولىپ قارسى تۇرۋىمىز كەرەك. وعان قوسا زاڭنامالىق شارالار قابىلداۋعا ءتيىسپىز. سونىمەن بىرگە، جەمقورلىققا قاتىستى قىلمىستاردى انىقتاۋ جانە اشۋ جونىندەگى جۇمىستاردى كۇشەيتۋ قاجەت. سوندا عانا جەمقورلىقپەن تاباندى تۇردە كۇرەسە الامىز، – دەدى ول.
پىكىر قالدىرۋ