ماڭعىستاۋ وبلىسى پوليسيا دەپارتامەنتىنىڭ باستىعى قىزمەتىنە ايان دۇيسەمبايەۆ تاعايىندالدى. بۇل تۋرالى polisia.kz سايتى حابارلادى.
بۇعان دەيىن اتالعان قىزمەتتە جاناربەك باقتىبايەۆ بولعان.
پوليسيا دەپارتامەنتىنىڭ جاڭا باسشىسىن ىشكى ىستەر ءمينيسترىنىڭ ورىنباسارى مۇرات بايمۇقاشيەۆ تانىستىردى.
ايان ءسابيت ۇلى دۇيسەمبايەۆ 1966 جىلى اتىراۋ وبلىسىندا دۇنيەگە كەلگەن. ءال-فارابي اتىنداعى قازاق مەملەكەتتىك ۋنيۆەرسيتەتىن بىتىرگەن.
ىشكى ىستەر ورگاندارىندا 1999 جىلدان باستاپ قىزمەت اتقارىپ كەلەدى. 2012 جىلدان باستاپ اتىراۋ وبلىسى ىشكى ىستەر دەپارتامەنتى باستىعىنىڭ ءبىرىنشى ورىنباسارى، 2016-2019 جىلدارى وبلىستىڭ ىشكى ىستەر دەپارتامەنتتىڭ باستىعى قىزمەتتەرىن اتقارعان. 2019-2021 جىلدارى ماڭعىستاۋ وبلىسى اكىمىنىڭ كەڭەسشىسى بولىپ جۇمىس ىستەدى. جاڭا لاۋازىمىنا دەيىن تجم ورتكە قارسى قىزمەت كوميتەتى ءتوراعاسىنىڭ ورىنباسارى قىزمەتىن اتقاردى. پوليسيا گەنەرال-مايورى.
ايان دۇيسەمبايەۆ 2019 جىلعى مامىردا اتىراۋ وبلىسىنىڭ پوليسيا دەپارتامەنتىن باسقارىپ تۇرعاندا داۋلى وقيعاعا تاپ بولىپ، قىزمەتىنەن بوساتىلعان. وعان كەزەكتى شەن بەرىلگەننەن كەيىن تۋعان جەرى – اتىراۋ وبلىسى قىزىلقوعا اۋداندا جەرلەستەرى وعان ات مىنگىزگەن. ۇزاماي الەۋمەتتىك جەلىدە قىزمەتتىك كيىمدەگى ايان دۇيسەمبايەۆتىڭ جىلقىمەن ويقاستاپ تۇرعان ۆيدەوسى تاراپ، قىزۋ تالقىلاندى. ارتىنشا پرەزيدەنت قاسىم-جومارت توقايەۆ ىشكى ىستەر ءمينيسترى ەرلان تۇرعىمبايەۆقا بەينە جازباداعى كەيىپكەردىڭ "ەرسى قىلىعىنا" قاتىستى قىزمەتتىك تەكسەرىس جۇرگىزۋدى تاپسىرعان. تەكسەرىس ناتيجەلەرى بويىنشا ىشكى ىستەر ءمينيسترى دۇيسەمبايەۆتى "قىزمەتتىك ەتيكانى بۇزعانى ءۇشىن" قىزمەتىنەن بوساتقان.
پىكىر قالدىرۋ