قاڭتارداعى وقيعادان كەيىن ۇستالىپ، قىرعىزستان بيلىگىنىڭ ارالاسۋىنان سوڭ بوساتىلعان قىرعىزستاندىق مۋزىكانت ۆيكرام رۋزاحۋنوۆ قاماۋدا وتىرعاندا ازاپتالعانىن مويىنداپ، ءوزىن ەكراننان كورسەتكەن جەرگىلىكتى تەلەارنالارعا العىسىن ءبىلدىردى. سوزىنشە، تەلەارنالار كورسەتكەننىڭ ارقاسىندا ونى وتانداستارى تانىپ، قاماۋدان بوساۋىنا مۇمكىندىك تۋعان.

– مەنى ۋايىمداپ، بوستاندىققا شىعۋىما ىقپال ەتكەندەردىڭ بارلىعىنا شىن جۇرەكتەن العىس ايتامىن. قازاقستاننىڭ تەلەارنالارىنا راحمەت. ەگەر دە بۇل سۇحبات بولماعاندا ەشكىم مەنىڭ قايدا ەكەنىمدى جانە ماعان نە بولعانىن بىلمەيتىن ەدى. سىزدەردىڭ ارقالارىڭىزدا بۇكىل الەمدەگى پاراساتتى ادامدار بولىپ جاتقان وقيعالارعا شىنايى قاراپ، قازاقستانداعى وقيعالارعا بايسالدى باعا بەرە الدى. مەن جۋرناليستەرگە قىرعىزستاندا مەنىڭ جۇمىسىم بار ەكەنىن ايتقاندا ەشكىم سەنبەدى جانە ولار مەنى تىڭدامادى. نەگىزسىز ۇستالعان، كىناسىز جۇزدەگەن ادامنىڭ ىشىنەن مەنى تاڭداپ، كامەراعا تۇسىرگەن ادامعا راحمەت. دارىگەرلەر مەن ءسال بولماعاندا ءولىپ كەتۋىم مۇمكىن ەدى دەپ وتىر. ويتكەنى سىنعان قابىرعالار سول جاق وكپەمە زاقىم كەلتىرگەن، تاعى بىرنەشە سوققى بولسا، جۇرەككە زاقىم تۇسەر ەدى، – دەيدى رۋزاحۋنوۆ الەۋمەتتىك جەلىدەگى پاراقشاسىندا.

ۆيكرام رۋزاحۋنوۆ سوققىعا جىعىلعان ۋاقىتتا تۋىستارى، دوستارى، شوۋ-بيزنەستەگى ارىپتەستەرى جانە ونى ۆيدەودان تانىعان ادامداردىڭ بارلىعى ونى قولداعانىن جانە بولعان جاعدايدى بەلسەندى تۇردە جەلىدە جاريالاپ وتىرعانىن اتاپ ءوتتى.

– قازاقستاننىڭ قۇزىرلى ورگاندارى مەنىڭ تۇلعامدى تەكسەرىپ كورمەدى. جاۋاپ الۋ كەزىندە مەن بەلگىلى مۋزىكانت ەكەنىمدى قايتا-قايتا قايتالادىم، ال ازاپتاۋ كەزىندە ايقايلاپ مەن تۋرالى عالامتوردان قاراۋلارىن سۇرادىم. جاۋاپ رەتىندە ولار مەنى ۇرا ءتۇسىپ، مازاق ەتتى، – دەپ جازدى ول.

ەسكە سالا كەتەيىك، 9 قاڭتاردا "قازاقستان" جانە "حابار 24" ارنالارى "قازاقستانداعى ميتينگكە قاتىسقانى ءۇشىن اقشا الدى" دەپ قىرعىزستاندىق ازاماتتى كورسەتكەن ەدى. ۆيدەودا بەتى-اۋزى كوگەرگەن ازامات 1 قاڭتاردا بەيتانىس ادامدار تەلەفون ارقىلى حابارلاسىپ، ميتينگىگە قاتىسۋ ءۇشىن 90 مىڭ تەڭگە ۇسىنعانىن، بيلەت اپەرگەنىن، پاتەرگە ورنالاستىرعانىن ايتادى. 

كوپ ۇزاماي قىرعىزستاندىق باسىلىمدار ۆيكرام رۋزاحۋنوۆ قىرعىزستاندا بەلگىلى دجاز مۋزىكانتى ەكەنىن، قازاقستانعا كونسەرتكە كەلگەنىن جارىسا جازدى. 

قىرعىزستاننىڭ سىرتقى ىستەر مينيسترلىگى وقيعاعا بايلانىستى تەكسەرىس جۇرگىزىپ، رۋزاحۋنوۆقا پوليسيا ءزابىر كورسەتكەنىن مالىمدەپ، قازاقستانعا قارسىلىق نوتاسىن جاريالادى.

10 اقپان كۇنى ۆيكرام رۋزاحۋنوۆ قىرعىز بيلىگى ارالاسقان سوڭ بوساتىلعان.