بۇعان دەيىن رەسەي تاراپى ۋكرايناعا جاقىن ماڭداعى اسكەرلەرىن شەگىندىرپ جاتقانى تۋرالى اقپارات جاريالاعان.
رەسەي اسكەرلەرىنىڭ ءبىر بولىگىنىڭ شىعارىلاتىنى تۋرالى سەيسەنبى كۇنى تاڭەرتەڭ رەسەي قورعانىس مينيسترلىگىنىڭ باسپا ءسوز حاتشىسى گەنەرال-مايور يگور كوناشەنكوۆ حابارلاعان.
ۇلىبريتانيا اسكەري شەگىنۋدىڭ ءالى ەشقانداي ايقىن بەلگىلەرىن كورمەگەنىن اتاپ ءوتتى.
ۇلىبريتانيا پرەمەر-مينيسترى بوريس دجونسون جۋرناليستەرگە سوڭعى بارلاۋ مالىمەتتەرى تۋرالى ايتىپ، "ءبىزدىڭ بۇگىن كورىپ وتىرعانىمىز ءالى دە كوڭىل كونشىتپەيدى" دەدى. ول رەسەيدىڭ ۋكراينا شەكاراسى ماڭىندا جانە بەلارۋستە دالالىق اۋرۋحانالار سالىپ جاتقانىن اتاپ ءوتتى. دجونسون رەسەيدىڭ بۇل ارەكەتتەرىن "تەك (شابۋىلعا) دايىندىق رەتىندە تۇسىنۋگە بولادى" دەدى.
"ۋكراينامەن شەكاراداعى وتە جاقىن جەردە باتالوندىق تاكتيكالىق توپتار كوبىرەك. ماسكەۋ كەز كەلگەن ساتتە (ۋكرايناعا) سوعىس اشۋعا ۇلكەن دايىندىق بار. مەنىڭ ويىمشا قازىرگى ۋاقتتا ءبىر بىرىنە ۇقساماعان ءار ءتۇرلى سيگنالدار بار" دەپ تۇيىندەدى ول.
سوڭعى ايلاردا رەسەي ۋكراينامەن شەكاراعا 100 000-نان استام اسكەرى مەن اسكەري تەحنيكاسىن ورنالاستىردى، بۇل باتىس ەلدەرى ءۇشىن "ماسكەۋ كورشىسىنە باسىپ كىرۋى مۇمكىن" دەگەن قورقىنىش تۋدىردى. ال، رەسەي ىقتيمال شابۋىل تۋرالى جوسپارلاردى جوققا شىعارىپ كەلەدى.
پىكىر قالدىرۋ