"Nur Otan" پارتياسىنىڭ اتقارۋشى حاتشىسى اسحات ورالوۆتىڭ بۇيرىعىمەن "Nur Media" حولدينگىنىڭ باس ديرەكتورى قىزمەتىنە رۋسلان الىشيەۆ تاعايىندالدى. بۇل تۋرالى پارتيانىڭ باسپا ءسوز قىزمەتى حابارلادى.

رۋسلان الىشيەۆ م.قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ جانە ا.مىرزاحمەتوۆ اتىنداعى كوكشەتاۋ ۋنيۆەرسيتەتىنىڭ تۇلەگى.

ول سولتۇستىك قازاقستان وبلىسىنداعى جەرگىلىكتى اتقارۋشى ورگانداردا، پەتروپاۆل قالاسى ىشكى ساياسات ءبولىمىنىڭ مامانى قىزمەتىنەن باستاپ، باسقارما باسشىسى، وبلىس اكىمىنىڭ ورىنباسارىنا دەيىنگى ءتۇرلى لاۋازىمداردى اتقاردى.

ق ر اقپارات جانە كوممۋنيكاسيالار مينيسترلىگىنىڭ اقپارات كوميتەتى ءتوراعاسىنىڭ ورىنباسارى بولىپ ىستەدى.

ەكى جىلدان استام "Nur Otan" پارتياسى ورتالىق اپپاراتىنىڭ ساياسي جۇمىس دەپارتامەنتىن باسقاردى.

2020 جىلدىڭ مامىر ايىنان باستاپ قازاقستان رەسپۋبليكاسى پرەزيدەنتى جانىنداعى "ورتالىق كوممۋنيكاسيالار قىزمەتى" رەسپۋبليكالىق مەملەكەتتىك مەكەمەسىنىڭ ديرەكتورى قىزمەتىن اتقاردى.

"Nur Media" حولدينگى – قازاقستاننىڭ ءىرى مەديا كومپانيالارىنىڭ ءبىرى. 2008 جىلى 25 قاراشادا "Nur Otan" پارتياسىنىڭ باستاماسىمەن قۇرىلعان. بۇگىندە حولدينگتىڭ كومپانيالار توبىنا "استانا" تەلەارناسى، "Aiqyn"، "ليتەر"، Túrkistan"، "قازاقستان تەمىرجولشىسى" گازەتتەرى، "NS" جانە "ORDA FM" راديوسى كىرەدى.