رەسەي پرەزيدەنتى ۆلاديمير پۋتين كەشە "دونەسك حالىقتىق رەسپۋبليكاسى" مەن "لۋگانسك حالىقتىق رەسپۋبليكاسىنىڭ" ەگەمەندىگى مەن تاۋەلسىزدىگىن مويىنداۋ تۋرالى جارلىققا قول قويدى. ال ۋكراينا مەن باتىس ەلدەرى رەسەي ارەكەتىن ۋكراينانىڭ ەگەمەندىگى مەن اۋماقتىق تۇتاستىعىن بۇزۋ دەپ باعالايدى. تومەندە باسپا ءسوز بەن الەۋمەتتىك جەلىدە قىزۋ تالقىلانىپ جاتقان "دحر"، "لحر" قالاي پايدا بولىپ، قانداي جاعدايدا قۇرىلعانى تۋرالى قىسقاشا اقپارات ۇسىنىلعان.

"دونەسك حالىقتىق رەسپۋبليكاسى" مەن "لۋگانسك حالىقتىق رەسپۋبليكاسى" – ۋكراينانىڭ شىعىسىندا ورنالاسقان دونباسس ايماعىنا كىرەتىن دونەسك جانە لۋگانسك وبلىستارى اۋماعىندا ءوزىن تاۋەلسىز دەپ جاريالاعان سەپاراتيستىك مەملەكەت. 2014 جىلى ۋكرايناداعى ساياسي داعدارىس بارىسىندا جاڭا ۇكىمەتكە قارسىلىق رەتىندە پايدا بولعان. تاۋەلسىزدىكتەرىن 2014 جىلعى 12 مامىردا جاريالاعان. سودان بەرى كەشەگى كۇنگە دەيىن ولاردىڭ تاۋەلسىزدىگىن ءىشىنارا تاۋەلسىز دەپ تانىلعان وڭتۇستىك وسەتيا رەسپۋبليكاسى عانا مويىنداعان. بىرىككەن ۇلتتار ۇيىمى، ەۋرو وداق، ەۋروپا قاۋىپسىزدىك جانە ىنتىماقتاستىق ۇيىمى سەكىلدى حالىقارالىق بەدەلدى ۇيىمداردىڭ ەشبىرى سەپاراتيستىك رەسپۋبليكالاردىڭ تاۋەلسىزدىگىن مويىنداماعان.

"لۋگانسك حالىقتىق رەسپۋبليكاسى" تاۋەلسىزدىگىن جاريالاعان سوڭ رەسەي قۇرامىنا كىرۋگە نيەت ءبىلدىرىپ، "دونەسك حالىقتىق رەسپۋبليكاسىمەن" كونفەدەراتيۆتىك "جاڭارەسەي" مەملەكەتىن قۇرۋ بويىنشا كەلىسىمگە كەلگەن. الايدا مينسك كەلىسىمىن جۇزەگە اسىرۋ ءۇشىن ۋاعدالاستىق ۋاقىتشا توقتاتىلعان.

ال دحر بيلىگى ۋكراينا بيلىگىن دونباسستا "بەيبىت تۇرعىنداردى قىرعان" "قىلمىستىق رەجيم" دەپ تانيدى.

قوس ەلدە دە جوعارى لاۋازىم يەسى، اتقارۋشى بيلىك جەتەكشىسى – ەلدىڭ باسشىسى سانالادى. مەملەكەتتىك ينستيتۋتتار تولىق جاساقتالىپ بولماعان.

"دحر"-دا 2 ملن 200 مىڭنان استام، "لحر"-دا 1 ملن 400 مىڭنان استام ادام تۇرادى. حالقىنىڭ باسىم بولىگىن ۋكرايندەر مەن ورىستار قۇرايدى. قوس ەلدە دە جالعىز مەملەكەتتىك ءتىل – ورىس ءتىلى.

ۋكراينا بيلىگى سەپاراتيستىك مەملەكەتتەردى رەسەي فەدەراسياسى باسىپ العان دونەسك جانە لۋگانسك وبلىستارىنىڭ ءبىر بولىگى دەپ تانيدى. رەسەي بولسا، دونباسستاعى قارۋلى قاقتىعىسقا قاتىسى بارىن جوققا شىعارادى. ۋكراينا كونستيتۋسياسىنا ساي، "دحر" مەن "لحر" يەلىك ەتەتىن اۋماق ۋكراينانىڭ مەملەكەتتىك ەگەمەندىگى ارەكەت ەتەتىن ايماق بولىپ سانالادى. قازىرگى ۋاقىتتا سەپاراتيستىك رەسپۋبليكالار بۇرىنعى دونەسك پەن لۋگانسك وبلىستارى اۋماعىنىڭ ۇشتەن ءبىر بولىگىن باقىلايدى. وزدەرى ەكى وبلىس اۋماعىنا تۇتاس يەلىك ەتەمىز دەپ ەسەپتەيدى. قوس رەسپۋبليكا دا ۋكراينادا تەرروريستىك دەپ تانىلعان.

دونباسستاعى جاعداي شەشىلمەگەن كونفليكت رەتىندە ءجيى سيپاتتالادى.