ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ 23 اقپاندا ۋتيليزاسيالىق الىم كولەمى انىقتالاتىنىن مالىمدەدى.
– ەرتەڭ اۆتوكولىك پەن اۋىل شارۋاشىلىعى تەحنيكالارىنا ۋتيليزاسيالىق الىم ستاۆكالارى جاريالانادى. ال اۋدارىلعان اقشا بويىنشا، اقپارات بارىنە بەلگىلى. "وكم وپەراتورىنىڭ" ەسەپشوتتارىندا، "وكم وپەراتورىنىڭ" ەدب شوتتارىندا شامامەن 220 ميلليارد تەڭگە بار. ول قاۋلى بويىنشا، "جاسىل دامۋ" اق-قا بەرىلگەن، – دەدى سەرىكقالي برەكەشيەۆ.
قوعامدا ۋتيلالىم مولشەرىنىڭ جوعارى بولۋىنا بايلانىستى نارازىلىق كوپ.
جۋىردا پرەزيدەنت قاسىم-جومارت توقايەۆ ۇكىمەتكە ۋتيليزاسيالىق الىم ستاۆكاسىن قايتا قاراۋدى جانە "وپەراتور "روپ-تىڭ" قىزمەتىن توقتاتۋدى تاپسىرعان. اشىق دەرەككوزدەردە "وپەراتور "روپ" ەكس-پرەزيدەنت نۇرسۇلتان نازاربايەۆتىڭ كەنجە قىزى ءاليا نازاربايەۆاعا تيەسىلى ەكەنى ايتىلادى.
19 قاڭتاردا ۇكىمەت "وكم وپەراتورى" جشس-نىڭ (وپەراتور روپ) قىزمەتىن توقتاتىپ، وندىرۋشىلەردىڭ كەڭەيتىلگەن مىندەتتەمەلەرىن، اكىمشىلەندىرۋ فۋنكسيالارىن مەملەكەتتىك ۇيىم – "جاسىل دامۋ" اق ورىندايتىنىن حابارلاعان. ۇزاماي جۋرناليست ۆاديم بورەيكو ۋتيلالىم جينايتىن جاڭا ۇيىم رەتىندە بەلگىلەنگەن "جاسىل دامۋ" اكسيونەرلىك قوعامىنا بۇرىنعى وپەراتور "روپ"-تىڭ قوجايىنى، ەكس-پرەزيدەنت ن.نازاربايەۆتىڭ كەنجە قىزى ءاليا نازاربايەۆانىڭ قاتىسى بار ەكەنى تۋرالى جازدى. بۇعان قاتىستى ۇكىمەت رەاكسيا تانىتقان جوق.
پىكىر قالدىرۋ