قوس بۇيرەگى بىردەي سەمىپ، اۋىر سىرقاتقا دۋشار بولعان دارىندى جاس كۇيشى-ۇستاز بەكزات مۇستافايەۆقا بەلورۋس مەملەكەتىندە وتا جاساۋ ءۇشىن قوماقتى قاراجات قاجەت. ونەرلى جىگىتكە قارجىنى جيناۋ وڭاي بولماي تۇر. سوندىقتان جاس كۇيشى شارق ۇرىپ اقشا تابۋمەن الەپ. قولىنان كەلەرى قارا دومبىراسىمەن كۇي شەرتىپ، كوپشىلىكتى قايىرىمدىلىق كونسەرتىنە شاقىرۋ. سونداي ءىس-شارالاردىڭ ءبىرى 27 اقپان كۇنى الماتىداعى ا.جۇبانوۆ مەكتەپ-ينتەرناتىنىڭ ۇلكەن زالىندا وتەدى.
بەكزات وتا جاساتۋ ءۇشىن بىلتىر بەلورۋستە ارنايى تەكسەرىستەن ءوتىپ، دونورلىق ترانسپلانتاسيالاۋدىڭ كەزەگىنە تۇرىپ كەلگەن. ول ساپارعا جۇمسالعان قارجى دا بەكزاتقا ماڭداي تەر، تىنىمسىز ەڭبەكتىڭ، جۇرەگى جۇمساق، قولى اشىق جومارت تا مەيىرىمدى جانداردىڭ ارقاسىندا جينالدى.
دارىندى جىگىت الدىمەن شاپقىلاپ ءجۇرىپ، ونەردەگى ۇلكەن-كىشى ارىپتەستەرىنىڭ قولداۋىمەن، بىلتىر مامىر ايىندا "اڭساۋ" دەپ اتالاتىن ونلاين فورماتتا كونسەرت بەردى. مۇنىمەن توقتاماي قۇزىرلى مينيسترلىكتەرگە ۇسىنىس-تىلەك حاتتارمەن شىقتى. سونىڭ ناتيجەسىندە، ماۋسىم ايىندا "مەن سەنى سۇيەمىن، ءومىر!" اتتى قايىرىمدىلىق كونسەرتىن وتكىزدى. وعان "وتىرار سازى" فولكلورلىق-ەتنوگرافيالىق وركەسترى جانە جەكەلەگەن تانىمال ونەر تۇلعالار، سونىمەن بىرگە ءوزىنىڭ باۋلىپ جۇرگەن تاڭداۋلى شاكىرتتەرى قاتىستى. ونەرپازدىڭ بۇل كونسەرتى "اباي TV" تەلەارناسىنان كورسەتىلدى.
وسىناۋ ۇلكەن ءىس-شارانىڭ ءبارىن بەكزات اپتاسىنا ءۇش كۇن دياليز ورتالىعىنا بارىپ، جاساندى قان تازارتۋ پروسەسىن باسىنان كەشە ءجۇرىپ، كەي كۇندەرى 200-گە دەيىن كوتەرىلگەن قان قىسىمىنا توزە ءجۇرىپ اتقاردى.
اۋىر سىرقاتتى جەڭۋ جولىندا بەكزات كەزەكتى رەت قارا دومبىراسىن قولىنا الماق. 27 اقپان كۇنى "امانات" ونەر ورتالىعى مەن ءوزى تۇلەپ ۇشقان ا.جۇبانوۆ اتىنداعى ونەر مەكتەپ-ينتەرناتى ۇجىمدارى قولداپ، قولعابىس جاساۋىمەن "ومىر-وزەن اعادى..." اتتى قايىرىمدىلىق كونسەرت وتكىزىلمەك.
كونسەرت الماتى قالاسىندا دارىندى بالالارعا ارنالعان ا.جۇبانوۆ مەكتەپ-ينتەرناتىنىڭ ۇلكەن كونسەرت زالىندا ساعات 15:00-دە باستالادى.
كونسەرتتى وتكىزۋگە "امانات" ونەر ورتالىعىنىڭ جەتەكشىسى، ق ر ەڭبەك سىڭىرگەن قايراتكەرى، ءداستۇرلى ءانشى ساۋلە جانپەيىسوۆا مۇرىندىق بولىپ وتىر. كەشتە ونەر ورتالىعىنىڭ ۇستازدارى جانە ۇزدىك شاكىرتتەرى ونەر كورسەتەدى. كىرۋ تەگىن. تەك كەلۋشىلەر تالانتتى كۇيشىنىڭ ونەرىمەن سۋسىنداپ، قولداۋ رەتىندە بەكزاتتىڭ ەسەپ-شوتىنا اركىم مۇمكىندىگىنشە اقشا اۋدارسا، بولعانى.
دارىندى ونەرپازدىڭ وتاسىنا قارجى جيناۋعا اتسالىسامىن دەگەن جاندار ءۇشىن تومەندە بەكزاتتىڭ ەسەپ-شوتتارىنىڭ رەكۆيزيتتەرى كورسەتىلگەن:
رەكۆيزيتتەر:
مۇستافايەۆ بەكزات داۋرەن ۇلى
KASPI GOLD: 4400 4301 6544 0931
HALYK BANK: 4405 6397 6384 0350
پىكىر قالدىرۋ