الماتى قالاسى پوليسيا دەپارتامەنتى ىشكى قاۋىپسىزدىك باسقارماسى تانىمال ۆاينەرلەر مەيىرجان تورەبايەۆ، مەيىرحان شەرنيازوۆ جانە ءازىمجان سايدبايەۆقا قاتىستى ءىستى تەرگەپ جاتىر، دەپ حابارلادى كازتاگ اقپارات اگەنتتىگى.

"الماتى پوليسيا دەپارتامەنتى بىرەۋدىڭ اقشاسىن الداپ العان ەر ادامدى ۇستاۋ فاكتىسىن راستايدى. ءقازىر اتالعان فاكتىنى الماتى پد ءىقب تەرگەۋدە. ءىس قىلمىستىق كودەكستىڭ 190-بابى 2-بولىگى (الاياقتىق) بويىنشا سوتقا دەيىنگى تەرگەۋدىڭ ءبىرىڭعاي تىزىلىمىندە تىركەلگەن. كۇدىكتى ۇستالىپ، سوت سانكسياسىمەن قاماۋعا الىندى. سونداي-اق كۇدىكتىنىڭ قۇقىق قورعاۋ ورگاندارىنا ەشقانداي قاتىسى جوق ەكەنىن ەسكەرتەمىز" دەلىنگەن حابارلامادا. 

بۇعان دەيىن الەۋمەتتىك جەلىدە تارالعانداي، Mudaraba Capital جانە AstexKZ قارجى پيراميدالارىنىڭ جۇمىسىنا بايلانىستى قوزعالعان رەزونانستىق قىلمىستىق ءىس بارىسىندا 4 اقپان كۇنى ءىىم قاۋىپسىزدىك قىزمەتى مەن الماتى قالالىق پوليسيا دەپارتامەنتىنىڭ كۇزەت قىزمەتى ماماندارى الماتىدا قۇزىرلى ورگاننىڭ ەكس-قىزمەتكەرىن 10 ملن تەڭگە كولەمىندە پارا الۋ ۇستىندە ۇستاعان.

"پارا ىسكە قاتىسى بار ادامداردىڭ بىرىنەن الىنعان. قازىرگى ۋاقىتتا اتالعان فاكتىلەر بويىنشا تەرگەۋ امالدارى جۇرگىزىلۋدە. وسى وقيعالارعا بايلانىستى سوڭعى 10 ايدا اتالعان قارجى پيراميدالارىنا قاتىستى قىلمىستىق ءىستى تەرگەگەن جەدەل توپتىڭ باسشىسى قىزمەتىنەن شەتتەتىلدى. ۇستاۋ ارەكەتىنەن كەيىن ءىس تەرگەۋ توبىنىڭ جاڭا باسشىسىنا بەرىلدى. سودان كەيىن تانىمال بلوگەرلەر مەيىرجان تورەبايەۆ پەن مەيىرحان شەرنيازوۆ زاڭدى تۇردە جابىرلەنۋشى مارتەبەسىنەن كۇدىكتى مارتەبەسىنە اۋىستىرىلدى" دەلىنگەن حابارلامادا.

ەسكە سالا كەتەيىك، 10 اقپاندا قازاقستاندىق ءۇش بەلگىلى ۆاينەر مەيىرجان تورەبايەۆ، مەيىرجان شەرنيازوۆ، ازيمجان سايدبايەۆ قارجى پيراميداسىنا جەتەكشىلىك ەتتى دەگەن كۇدىككە ىلىنگەن. كەيىن تورەبايەۆ پەن شەرنيازوۆ 1000 اەك مولشەرىندە (3 063 000 تەنگە) كەپىل وتەپ، بوساتىلعان. تەرگەۋ مالىمەتتەرى بويىنشا، ۆاينەرلەر Mudarabah Capital قارجىلىق پيراميداسىن جارنامالاپ قانا قويماي، سونىمەن بىرگە ونىڭ يەلەرى رەتىندە ۇنەمى تابىس الىپ وتىرعان. 11 اقپاندا پوليسيا سايدبايەۆتى ىزدەستىرۋ جۇمىستارى باستالىپ، ونى سىرتتاي ەكى ايعا قاماۋ تۋرالى شەشىم شىققان.