رەسەي-ۋكراينا سوعىسى كەزىندە رەسەيدىڭ استراحان وبلىسى ۆولودار اۋدانىندا تۇراتىن ەتنيكالىق قازاق قازا تاپقان. بۇل تۋرالى ازاتتىق راديوسى ەۋروپا قىزمەتىنىڭ ءجۋرناليسى تولدار باكتەمير حابارلادى. ءجۋرناليستىڭ جازباسىن بەسسيمپتومنو تەلەگرام ارناسى جاريالادى.
"استراحانداعى بارلىق دەرلىك قازاق وتباسىنىڭ اسكەردە ادامى بار، ويتكەنى بۇل – وسىنداعى كوپشىلىك ءۇشىن الەۋمەتتىك قوزعالىستىڭ جالعىز قولجەتىمدى ءتۇرى. ەلەستەتىڭىزشى، ءسىز ۇلتىڭىزعا بولا ەكىنشى سورتتى ازامات سانالاتىن مەملەكەتتە تۇراسىز. سوسىن ءسىزدى الادى دا ۋكرايناداعى وزدەرى فاشيست دەپ اتايتىندارعا قارسى سوعىسۋعا جىبەرەدى" دەيدى تولدار باكتەمير twitter-دە.
تولدار باكتەمير سونداي-اق استراحان وبلىسىنا بىرنەشە ەتنيكالىق قازاقتىڭ ءمايىتى جەتكىزىلگەنىن، قازا تاپقانداردىڭ ءبىرىنىڭ اناسى بالاسىن ۋكرايناداعى "اسكەري وقۋ-جاتتىعۋعا" دەپ الىپ كەتكەنىن تۋرالى ايتقانىن ءمالىم ەتتى.
جۋرناليست تانىسىنىڭ سوزىنشە، بۇل جاقتاعى كەدەيشىلىك پەن ءراسيزمنىڭ كەسىرىنەن استراحاندىق قازاقتار جانباعۋ مەن ەل كورۋدىڭ جالعىز امالى رەتىندە اسكەري قىزمەتتى تاڭداۋعا ءماجبۇر ەكەنىن جەتكىزەدى.
رەسەي بيلىگى بىرنەشە كۇنگە جالعاسىپ جاتقان ۋكرايناداعى اسكەري قيمىلدار كەزىندە ادام شىعىنى بولعانى تۋرالى تەك كەشە عانا حابارلادى. وعان دەيىن ءوز اسكەرى جاعىندا قازا تاپقاندار جوق دەپ كەلگەن. ۋكراينا تاراپىنىڭ سوڭعى اقپاراتتارىندا شايقاستار كەزىندە 4 مىڭنان استام رەسەي اسكەرى مەرت بولعانى ايتىلادى.
پىكىر قالدىرۋ