قازگيدرومەت 3-5 ناۋرىز ارالىعىندا رەسپۋبليكانىڭ بارلىق ايماعىندا كۇن جىلىناتىنىن حابارلادى.

"4 ناۋرىزدا سيكلون جەرورتا تەڭىزىنەن ەلىمىزدىڭ اۋماعىنا اۋىسا باستايدى، ونىمەن بىرگە ىلعال مەن جىلۋدىڭ ۇلكەن قورىن، جاۋىن-شاشىن اكەلەدى، نەگىزىنەن جاڭبىر تۇرىندە جانە اۋا تەمپەراتۋراسىنىڭ كوپتەن كۇتكەن جوعارىلاۋى بولجانادى. سولتۇستىك ايماقتارداعى تەرمومەتر باعاندارى كۇندىزگى ۋاقىتتا 0-5 گرادۋسقا دەيىن، ال وڭتۇستىك ايماقتاردا ءتىپتى 15-20 گرادۋسقا دەيىن كوتەرىلەدى" دەلىنگەن اقپاراتتىق حابارلامادا.

سينوپتيكتەر ناۋرىز ايىندا ەلدىڭ باسىم بولىگىندە اۋانىڭ ورتاشا تەمپەراتۋراسى كليماتتىق نورمادان 1-2° جوعارى، باتىس قازاقستان جانە اتىراۋ وبلىسىنىڭ قيىر سولتۇستىك-باتىسىندا نورماعا جۋىق بولادى دەپ بولجايدى.

جاۋىن-شاشىن مولشەرى رەسپۋبليكا اۋماعىنىڭ باسىم بولىگىندە نورماعا جۋىق، ال سولتۇستىك-باتىس بولىگىندە نورمادان كوپ بولۋى مۇمكىن دەپ كۇتىلەدى.