مارقۇم زامانبەك ءنۇرقادىلوۆتىڭ بالاسى قايرات ءنۇرقادىلوۆ اكەسىنىڭ وپپوزيسيالىق جولعا تۇسكەنىن ايىپتاۋعا كوندىرۋگە، ونىڭ وتەمى رەتىندە ۇلكەن قىزمەت پەن اقشا ۇسىنۋعا تىرىسقاندار بولعانىن ءمالىم ەتتى.
– 17 جىلدا تالاي نارسە بولدى. "قايرات ءبىز جۋرناليستەردى شاقىرايىق، سەن نازاربايەۆ تۋرالى جاقسىلاپ تۇرىپ ايت. اكەڭ تۋرالى سۇراسا، "اكەم قاتەلەسىپ ەدى"، "نازاربايەۆتىڭ جولى دۇرىس" دەپ ايت. ءبىز ەرتەڭ ونى گازەتكە، تەليەۆيدەنيەگە شىعارىپ، نازاربايەۆتىڭ الدىنا قويامىز، كەرەك بولسا، سەن الماتىنىڭ اكىمى بولاسىڭ. سودان باستايىق، سەن جۇمىس ىستەي الاسىڭ. ميلليونەر بولىپ شىعاسىڭ. 5 جىل جەتەدى، 5 جىلدان كەيىن ءبارىن جاباسىڭ دا، شەتەلگە ۇشىپ كەتەسىڭ. اكەڭ نازاربايەۆقا (قارسى - رەد) شىققاندا سەندەردى ويلامادى عوي. كولىگىڭە قانشا جىل بولدى؟ بيزنەستە جىلىنا ەكى كولىك اۋىستىرادى" دەپ ايتتى عوي. ەكى-اق ينتەرۆيۋ. ءبىرى تەليەۆيدەنيەگە، ءبىرى گازەتكە. ونى ايتقاندار ەندىگى شەتەلگە كەتىپ قالدى. مەن كەلىسپەدىم، – دەيدى ول جۋرناليست نۇرسەيىت جىلقىشىبايعا بەرگەن سۇحباتىندا.
زامانبەك ءنۇرقادىلوۆ 2004 جىلى قازاقستاننىڭ ەكس-پرەزيدەنتى ن.نازاربايەۆتى وتكىر سىناي باستاعاندا توتەنشە جاعدايلار ءمينيسترى قىزمەتىنەن الىنادى. بالاسى قايرات ءنۇرقادىلوۆتىڭ سوزىنشە، ول دا جۇمىسسىز قالىپ، بيزنەسى جۇرمەگەن.
قايرات ءنۇرقادىلوۆ اكەسى ومىردەن وتەر الدىندا الماتى قالاسىنىڭ باسشىلىعىنا يمانعالي تاسماعامبەتوۆ تاعايىندالىپ، ونىمەن كەزدەيسوق كەزدەسىپ قالعانىن، سول كەزدە الماتى اكىمى اكەسى وپپوزيسيادا جۇرگەنىنە قاراماستان، ءوزىن قالالىق قۇرىلىس دەپارتامەنتى باسشىسىنىڭ ورىنباسارى ەتىپ جۇمىسقا العانىن ايتادى.
سونداي-اق ول اكەسى ومىردەن وتكەن سوڭ قوناقاسى، قىرقى، اسى سەكىلدى بارلىق راسىمدەردى تاسماعامبەتوۆ اتقارىپ بەرگەنىن اتاپ ءوتتى.
قايرات ءنۇرقادىلوۆ الماتى قالاسىن احمەتجان ەسىموۆ باسقارىپ تۇرعاندا ءتۇرعىن-ۇي باسقارماسىنا باسشى بولىپ تاعايىندالادى.
"نەگە ول جەرگە وتىرعىزدى دەگەندە، ول جەردىڭ جۇمىسى ءوزى وت. بىرەۋدەن اقشا الدىڭ با، بىردەن تۇرمەگە كەتەسىڭ. مەنىڭ الدىمدا ەكەۋىن قامادى عوي" دەيدى ول.
بۇل قىزمەتتى ول باۋىرجان بايبەكتىڭ تۇسىندا دا جاساپ، ونىمەن ءبىر جىل جۇمىس ىستەدى. ءوزىنىڭ سوزىنشە، وسى ءبىر جىلدا بايبەك ونى، ءتۇرعىن-ۇي باسقارماسىنىڭ باسشىسى رەتىندە بىردە-بىر رەت قابىلداماعان. قابىلداۋدى ماسەلەدەن حابارى جوق جاس ورىنباسارىنا تاپسىرعان. ءبىر جىلدان كەيىن، اكىمشىلىكتە باسقا سالاعا اۋىسۋعا مۇمكىندىگى بولماعان سوڭ، قىزمەتىنەن كەتكەن. كەتەر الدىندا باۋىرجان بايبەك پروكۋراتۋرا جىبەرىپ، ونىڭ جۇمىسىن تەكسەرتىپ، زاڭ بۇزۋشىلىقتار تابا الماعان.
قايرات ءنۇرقادىلوۆ الماتى اكىمدىگىنەن قىزمەتتەن كەتكەننەن كەيىن مارقۇم اكەسىنىڭ تانىستارى الماتى وبلىسىنىڭ ەكس-اكىمى اماندىق باتالوۆقا قاپشاعاي قالاسىنا اكىم ەتىپ جۇمىسقا ال دەپ بارعانىن جەتكىزدى.
"باتالوۆ قايرات فاميالياسىن اۋىستىرسا، الامىن دەدى. ول جىگىت مەنىڭ شەشەمنىڭ قولىنان ءشاي ىشكەن ادام، سولاي دەپ وتىر. ول كەزدە ءنۇرقادىلوۆ دەگەن فاميليادان ءبارى قورقاتىن" دەيدى.
وقي وتىررىڭىز:
♦ نازاربايەۆ 60 جاسقا تولعاندا اكىمدەر 1 ميلليون دوللاردان جيناپ بەردى – قايرات ءنۇرقادىلوۆ
پىكىر قالدىرۋ