بەلگىلى ساياساتتانۋشى دوسىم ساتپايەۆ كۇلبىلتەلەيتىن ديپلوماتيانىڭ ۋاقىتى ءوتتى، قازاقستان ءوزىنىڭ نىق پوزيسياسىن تاڭداۋى كەرەك دەپ سانايدى. بۇل تۋرالى ول "قازاقستاندىقتاردىڭ ۋكرايناعا گۋمانيتارلىق كومەگى جانە گۋمانيتارلىق اپات" پرەسس-كونفەرەنسياسىندا ايتتى.
– قازىرگى ۋاقىتتا الەم ناقتى ەكى لاگەرگە ءبولىنىپ تۇر: ءبىرى – ۋكرايناداعى جاعدايلاردى اگرەسسيا، سوعىس، بەلگىلى ءبىر دارەجەدە گەنوسيد دەپ سانايتىندار، ءبىرى – ۋكرايناداعى جاعدايدى "ازات ەتۋ وپەراسياسى" دەيتىندەر. سوڭعىلارىنىڭ قاتارى از. مەنىڭشە، قازاقستانعا ۇستانىمىن ناقتىلايتىن كەز كەلدى، – دەيدى ول.
سونداي-اق ساياساتتانۋشى بيزنەسمەندەر العاش رەت قازاقستان ەۋرازيالىق ەكونوميكالىق وداقتان شىعۋى كەرەك دەپ ايتىپ وتىرعانىن جەتكىزدى.
– قازاقستان بيلىگى ساياسي كوزقاراس تۇرعىسىنان ابايلاپ ارەكەت ەتىپ وتىرعانىن تۇسىنەمىن. ءبىراق ءقازىر سانكسيا تولقىنى قازاقستانعا دا سالقىنىن تيگىزەتىنىن كورىپ وتىرمىز. مەن كاسىبي ەكونوميست، بيزنەسمەندەردىڭ پىكىرىن وقيمىن. ولار ەكونوميكاعا تونەر ءقاۋىپتى باعالاي الادى. ءقازىر ولار دۇرلىگىپ وتىر. ولار سانكسيا شارالارى قازاقستانعا دا سالىنا ما دەپ الاڭدايدى، – دەيدى ول.
پىكىر قالدىرۋ