ازاتتىقتىڭ قازاق قىزمەتى ورىس قىزمەتىنە جىبەرىلگەن حابارلامادا سايتتا "قوعامدىق ماڭىزدى اقپاراتتىڭ بۇرمالانىپ بەرىلگەنى" جونىندە ەسكەرتۋ بارىن حابارلادى.
"روسكومنادزور سايتتاعى "رەسەيدىڭ ۋكرايناعا باسىپ كىرگەنى جونىندە" اقپاراتتى شىندىققا سايكەس كەلمەيدى دەپ تانىعان. روسكومنادزوردىڭ ايتۋىنشا، رەسەي "ۋكراينامەن سوعىسىپ جاتقان جوق، ونى رەسمي دەرەككوزدەر، ونىڭ ىشىندە رەسەي قورعانىس مينيسترلىگى" ايعاقتاعان. سوعىس تۋرالى اقپارات تاراتقانى ءۇشىن بۇعان دەيىن ازات ەۋروپا/ازاتتىق راديوسىنىڭ "ناستوياششەە ۆرەميا" جوباسى، ازاتتىقتىڭ ۋكراين قىزمەتىنىڭ "كرىم.رەاليي" جوباسى بۇعاتتالعان. ءبىر اي ىشىندە ازاتتىقتىڭ ورىس قىزمەتى روسكومنادزوردان ونداعان ەسكەرتۋ العان، اراسىندا وپپوزيسيالىق ساياساتكەر الەكسەي ناۆالنىيدىڭ كومانداسى مەن "پروەكت" باسىلىمىنىڭ زەرتتەۋلەرى نەگىزىندە جازىلعان ماقالالاردى ءوشىرۋ تۋرالى تالاپتار بار. ازات ەۋروپا/ازاتتىق راديوسى مەدياكورپوراسياسىنىڭ پرەزيدەنتى دجەيمي فلاي سول كەزدە رەداكسيا بۇل تالاپتاردى ورىندامايدى دەپ مالىمدەگەن" دەلىنگەن اقپاراتتىق حابارلامادا.
Meduza ءوزىنىڭ Telegram-كانالىندا روسكومنادزور سەرۆيسى سايت جۇمىسى باس پروكۋراتۋرانىڭ 24 اقپانداعى "اقپارات، اقپاراتتىق تەحنولوگيالار مەن اقپاراتتى قورعاۋ تۋرالى" زاڭىنا ساي شەكتەلگەنىن تۇسىندىرگەنىن حابارلادى.
زاڭدا جاپپاي تارتىپسىزدىككە، ەكسترەميستىك ارەكەتكە شاقىرعان، تەرريريزم اكتىسى تۋرالى جالعان اقپارات تاراتاتىن، قوعامدىق ءتارتىپ نەمەسە قاۋىپسىزدىكتىڭ جاپپاي بۇزىلۋىنا اكەلىپ سوعۋ ءقاۋپى بار اقپاراتتى تاراتۋشىلارعا شەكتەۋ ەنگىزىلەتىنى ايتىلادى.
بۇعان دەيىن رەسەيلىك "دوجد" تەلەارناسى قىزمەتىن ۋاقىتشا توقتاتقان. "ەكو موسكۆى" باسىلىمى ديرەكتورلار كەڭەسى راديو مەن سايتتارىن جابۋ تۋرالى شەشىم قابىلداعان.
اتالعان اقپارات قۇرالدارى رەسەيدىڭ ۋكرايناعا باسقىنشىلىعى تۋرالى اشىق، بەيتاراپ اقپارات تاراتقانى ءۇشىن وسىلاي قۋعىنعا ۇشىراپ وتىرعانىن ايتادى. رەسەي بيلىگىنە قاراستى باسپا ءسوز وقيعانى ءبىرجاقتى بايانداپ، بۇرمالانعان اقپارات تاراتىپ، پۋتين باسقىنشىلىعىن "دونباسس تۇرعىندارىن ۋكراينا تاراپىنان جاسالىپ جاتقان قىلمىستىق ارەكەتتەردەن قورعاۋ" دەپ ءتۇسىندىرىپ جاتىر.
بۇگىن رەسەي دۋماسى "فەيك تۋرالى" زاڭ قابالدايدى دەپ كۇتىلىپ وتىر. وعان ساي رەسەي ارمياسى تۋرالى جالعان اقپارات تاراتقانداردى 15 جىلعا باس بوستاندىعىنان ايىرۋ كوزدەلگەن.
ۋكراينا ۇرىستار كەزىندە ەكى جاقتىڭ دا شىعىنى تۋرالى حابارلاپ، رەسەي 10 مىڭنان استام جاۋىنگەرىن جوعالتقانىن ءمالىم ەتكەن. ۋكراين، باتىس جۋرناليستەرى رەسمي ماسكەۋ مەن كرەمگە باعىنىشتى باسپا ءسوز قۇرالدارى قاقتىعىس باستالعالى ادام شىعىنىن جاسىرىپ، ازايتىپ كورسەتىپ جاتقانىن ءجيى جازادى.
پىكىر قالدىرۋ