Twitter رەسەي ەلشىلىگىنىڭ پوستىن ءوشىرىپ تاستادى. Twitter جەلىسى لوندونداعى رەسەي ەلشىلىگىنىڭ "ۋكرايناداعى اۋرۋحانانى رەسەيلىك كۇشتەردىڭ بومبالاۋى- جالعان اقپارات" دەگەن ەكى جازباسىن ءوشىردى.
سارسەنبى كۇنى ۋكراينانىڭ ماريۋپول اۋرۋحاناسىنا شابۋىل جاسالىپ، ءۇش ادام قازا تاپتى.
ءبىراق رەسەي ەلشىلىگىنىڭ تۆيتتەرىندە "اۋرۋحانا ول كەزدە جۇمىس ىستەمەگەن جانە وقيعا ورنىندا سۋرەتكە تۇسكەن جارالانعان ايەلدەر اكتەرلەر بولعان" دەگەن نەگىزسىز مالىمدەمەلەر جاسالدى.
Twitter وكىلى رەسەي ەلشىلىگىنىڭ بۇل وتىرىگى تۆيتتەردىڭ زورلىق-زومبىلىق وقيعالارىن جوققا شىعارۋعا بايلانىستى ەرەجەلەرىن بۇزاتىنىن ايتتى.
رەسەي ەلشىلىگىنىڭ قىزمەتكەرلەرى ءوز تالاپتارىن راستايتىن ەشقانداي دالەل ۇسىنبادى.
رەسەي ەلشىلىگى اۋرۋحانا "ۇزاق ۋاقىت بويى جۇمىس ىستەمەدى" دەپ مالىمدەدى. دەگەنمەن، اۋرۋحانانىڭ Facebook پاراقشاسىندا ءبىر اپتا بۇرىن جاريالانعان جازبادا اۋرۋحانا وپەراسيانى جالعاستىرۋ ءۇشىن جانارماي سۇراعان.
وتكەن اپتادا Sky News جانە Associated Press اقپارات اگەنتتىگى ماريۋپولدە جارىلىستان زارداپ شەككەندەردىڭ ەمدەلىپ جاتقانىن جانە پەرزەنتحانا جەرتولەگە كوشىرىلگەنىن ايتادى.
رەسەي تاراپتىڭ "وقيعا ورنىندا جۇكتى ايەلدىڭ فوتوسۋرەتتەرىن جاساۋ ءۇشىن سۇلۋلىق بلوگەرىنىڭ قولدانىلعانى" تۋرالى مالىمدەمەسى دە كۇمان تۋدىرعان ويتكەنى قالادا تۇراتىن بۇل ايەلدىڭ وتكەن ايداعى Instagram جازبالارىندا جۇكتى بولعانى بايقالعان.
رەسەي تاراپى باستابىندا "جارىلىستى ۋكراينا قولدان جاسادى" دەگەن مالىمدەمەلەر تاراتقان. الايدا، ول مالىمدەمەنى لوندونداعى رەسەي ەلشىلىگى جاريالاعان جوق.
"جارىلىستى ۋكراينا قولدان جاسادى" دەگەن سىڭايداعى مالىمدەمەلەر الدىمەن Telegram حابار الماسۋ باعدارلاماسىنىڭ رەسەيلىك قولدانۋشىلارى اراسىندا تانىمال بولا باستادى، سودان كەيىن مەملەكەتتىك تەلەديدار جاڭالىقتارى مەن چات-شوۋلارىندا اتالدى.
بۇنداي نەگىزسىز جالعان مالىمدەمەلەردىڭ بارلىعى تۆيتتەردە جويىلعانىنا قاراماستان جەلىدە تارالۋدا.
جۇكتى سۇلۋلىق بلوگەرىنىڭ Instagram اككاۋنتى ەندى ونلاين تروللدەر مەن قاستاندىق تەورەتيكتەرىنىڭ نىساناسىنا اينالدى.
الەۋمەتتىك مەديا كومپانيالارى وزدەرىنىڭ پلاتفورمالارىندا جالعان اقپاراتپەن كۇرەسۋگە تىرىسۋدا، كوپتەگەن ءىرى تەحنولوگيالىق كومپانيالار رەسەيلىك RT جانە Sputnik حابار تاراتۋشىلارىن بۇعاتتادى.
ءبىراق Twitter رەسەيلىك ۇكىمەتتىك ۇيىمدارمەن بايلانىسى بار بىرنەشە اككاۋنتتارعا، سونىڭ ىشىندە ۆلاديمير ءپۋتيننىڭ Twitter-دەگى رەسمي اككاۋنتىنا تىيىم سالعان جوق.
رەسەي ەلشىلىگىنىڭ اككاۋنتى دا بەلسەندى كۇيىندە.
