باس پروكۋرور بەرىك اسىلوۆ ءماجىلىستىڭ جالپى وتىرىسىندا قاڭتار وقيعاسىنا بايلانىستى ءجۇرىپ جاتقان تەرگەۋ جۇمىستارىنىڭ ارالىق قورىتىندىلارى تۋرالى باياندادى. بەرىك اسىلوۆ مالىمدەمەسىندەگى ماڭىزدى تۇستار تومەندە ۇسىنىلىپ وتىر.
♦ قاڭتار وقيعاسى كەزىندە قازا تاپقانداردىڭ جالپى سانى 230-عا جەتتى. ونىڭ ىشىندە الماتىدا 11، الماتى وبلىسىندا 8، تارازدا 1، جالپى 20 ادام كەزدەيسوق جاعدايدا وققا ۇشقان. ولاردىڭ اراسىندا اتىس كەزىندە مەرت بولعان، بۇلىكشىلەردىڭ قولىنان قازا تاپقان، بلوكبەكەتتەگى اسكەريلەردىڭ تالابىنا باعىنباعاندار بار. وقيعا كەزىندە 19 اسكەري مەن پوليسيا وكىلى كوز جۇمعان.
♦ الماتى قالاسى، الماتى، جامبىل، قىزىلوردا وبلىسى ۇقك دەپارتامەنتىنىڭ باسشىلارى وقيعا كەزىندە عيماراتتارىن قارۋىمەن قوسا تاستاپ كەتكەن. وسىنداي دەرەكتەرگە بايلانىستى 7 قىلمىستىق ءىس قوزعالعان.
♦بۇلىكشىلەر تۇرعىنداردى قورقىتىپ، مەملەكەتتىك ورگانداردىڭ جۇمىسىن توقتاتۋعا تىرىسقاندىقتان قاڭتار وقيعاسى كەزىندەگى زاڭبۇزۋشىلىقتارعا تەرروريستىك اكت سيپاتى بەرىلگەن.
