بەلسەندىلەرگە قىلمىستىق كودەكستىڭ 174-بابىنىڭ 2-بولىگى بويىنشا (ۇلتتىق، الەۋمەتتىك ارازدىقتى قوزدىرۋ)، 179-بابىنىڭ 2-بولىگى بويىنشا (مەملەكەتتىڭ قاۋىپسىزدىگىنە نۇقسان كەلتىرىپ،بيلىكتى باسىپ الۋدى،ناسيحاتتاۋى) ءىس قوزعالعان.

 

"2018 جىلدان باستاپ سوتتالۋشىلار ب. مەن ن. عالامتور جەلىلەرىن پايدالانا وتىرىپ، ولار «Facebook» الەۋمەتتىك جەلىسىندەگى جەكە پاراقشالارىندا ۇلتتىق جانە الەۋمەتتىك ارازدىقتى قوزدىرۋعا، ورىس ۇلتىنىڭ وكىلدەرىنىڭ ۇلتتىق ار-نامىسى مەن قادىر-قاسيەتىنە نۇقسان كەلتىرۋگە باعىتتالعان، ولاردى «ۆاتنيكتەر» دەپ اتاپ جازبالار جاريالاپ، ورىس ۇلتى ازاماتتارىن ۇلتى مەن ناسىلىنە قاراي كەمسىتۋگە جول بەرىپ، ورىس ۇلتىنا جاتاتىن ادامدارعا قاتىستى كۇش قولدانۋعا شاقىرعانى سوت انىقتاعان. سونىمەن قاتار، سوتتالۋشى ب.، «Facebook» الەۋمەتتىك جەلىسىندە ءوزىن ۇلت پاتريوتى رەتىندە كورسەتىپ، مەملەكەتتىك جۇيەنى وزگەرتۋگە شاقىرىپ، بيلىكتى كۇشتەپ باسىپ الۋعا جانە كونستيتۋسيالىق قۇرىلىستى كۇشتەپ وزگەرتۋگە ۇگىتتەپ، بيلىككە قازاقستان رەسپۋبليكاسىنان تىس جەردە جۇرگەندەر قىلمىسكەرلەردى اكەلۋدى ۇسىنعان. سوتتالۋشى ن. «Facebook» الەۋمەتتىك جەلىسىندە وسىعان ۇقساس جاريالانىمدارعا جول بەرىپ، سىبايلاس جەمقورلىققا قارسى تۇبەگەيلى شارالاردى ۇسىنعان" دەلىنگەن سوت حابارلاماسىندا.

 

سوت بەلسەندى مارعۇلان بورانبايدى باس بوستاندىعىنان ايىرىپ قانا قويماي، 3 جىل مەرزىمگە بۇقارالىق اقپارات قۇرالدارىن جانە تەلەكوممۋنيكاسيا جەلىلەرىن پايدالانا وتىرىپ، قوعامدىق-ساياسي قىزمەتپەن اينالىسۋعا تىيىم سالدى.

 

بەلسەندىلەر كىنالارىن مويىندامادى. سوت شەشىمى ءالى كۇشىنە ەنگەن جوق.

 

سوت شەشىمىنە الەۋمەتتىك جەلىدە نارازىلىق ءبىلدىرىپ جاتقاندار كوپ. ولاردىڭ قاتارىندا ءماجىلىس دەپۋتاتتارى ەرلان سايروۆ پەن قازىبەك يسا سوت شەشىمى ءادىل ەمەس دەپ سانايدى. قازىبەك يسا "ماسەلەگە بايلانىستى ىسكە كىرىسىن جاتقانىن جازدى"