سوڭعى ۋاقىتتا hh.ru ۆاكانسيالار سايتىندا رەسەي ازاماتتارى رەزيۋمەلەرىنىڭ سانى ارتا تۇسكەن. قازىرگى تاڭدا ءىت مامانداردىڭ بەلسەندىلىگى جوعارى، دەپ جازادى HeadHunter كومپانياسىنىڭ قازاقستانداعى وكىلدىگى.
جۇمىس ىزدەگەن ءىت مامانداردىڭ باسىم كوپشىلىگى گرۋزيا، ارمەنيا، تۇركيا سەكىلدى ەلدەرگە باسىمدىق بەرىپ جاتىر.
Hh.ru ساراپشىلارى رەسەي ەڭبەك نارىعىندا ونسىز دا كادر تاپشىلىعى قاتتى سەزىلەتىنىن ايتىپ وتىر. تاپشىلىق كوروناۆيرۋستىڭ سالدارى، ميگرانتتاردىڭ كەتۋى مەن ەلدىڭ تابيعي ءوسىمىنىڭ تومەندەۋى سياقتى سەبەپتەرمەن بايلانىستى. قىسقاسى رەسەيلىك كومپانيالارعا ادام جەتپەيدى. ەلدەگى قيىن جاعدايدان كادرعا دەگەن سۇرانىس تومەندەپ، ديزبالانس ورنىنا كەلەدى دەگەن پايىم بار.
ماماندار قازاقستاننىڭ ەڭبەك نارىعىنا رەسەيگە سانكسيا سالىنۋىنىڭ سالدارى ءالى سەزىلە قويمادى دەيدى. ۆاكانسيالار جاريالاناتىن hh.kz سايتىندا رەسەيلىك جۇمىس ىزدەۋشىلەردىڭ وقىس بەلسەندىلىگى بايقالماعان. ساراپشىلار جۇمىسپەن قامتۋ سالاسىندا رەاكسيا بىردەن بىلىنبەيتىندىكتەن، اناليز جاساۋ ءۇشىن بەلگىلى ءبىر ۋاقىت ءوتۋى كەرەكتىگىن ايتادى. ەڭبەك نارىعىنداعى شىنايى كارتينا جازدىڭ باسىنا قاراي بەلگىلى بولا تۇسپەك.
ءبۇعان دەيىن رەسەي ۋكرايناعا باسىپ كىرگەلى مىڭداعان رەسەيلىك وتانىنان كەتىپ قالعانى حابارلانعان. رەسەيلىكتەردىڭ ەلىنەن كەتۋىنە قورقىنىش، سەنىمسىزدىك، سوعىس باستاعان مەملەكەتپەن ءوزىن بايلانىستىرعىسى كەلمەۋ، باستالىپ جاتقان ەكونوميكالىق داعدارىس سەبەپ.
رەسەيلىكتەر اراسىنداعى ەڭ تانىمال باعىت گرۋزيا بولىپ تۇر. گرۋزيا ىشكى ىستەر مينيسترلىگىنىڭ مالىمەتىنشە، 24 اقپاننان بەرى ەلگە 20 مىڭ رەسەيلىك بارعان. ونىڭ ءۇش مىڭعا جۋىعى ءالى سول جاقتا. ودان كەيىنگى تانىمال باعىتتار قاتارىندا ارمەنيا مەن تۇركيا بار. بۇدان بولەك رەسەيلىكتەر ازەربايجان، ءباا، قازاقستان، قىرعىزستان، ورتالىق جانە وڭتۇستىك امەريكانىڭ ۆيزاسىز ەلدەرىنە كەتىپ جاتىر.
ۆيزاسى بارلار ءۇشىنشى ەلدەر ارقىلى ۇلىبريتانياعا، اقش پەن ەۋرووداق ەلدەرىنە كبارۋعا تىرىسۋدا. پويىزبەن فينلياندياعا، اۆتوبۋسپەن لاتۆياعا قونىس اۋدارىپ جاتقاندار از ەمەس.
مۇنداي ەكسپانسيا بارعان ەلدەردەگى ءتۇرعىنۇي ارەنداسى باعاسىنىڭ كۇرت قىمباتتاۋىنا اكەلىپ سوققان. كەي جەرلەردە كەلۋشىلەردى سالقىن قارسى العان جاعدايلار دا كەزدەسكەن. ماسەلەن، گرۋزيا استاناسى تبيليسيدەگى پاتەر ارەنداسى حابارلاندىرۋلارىنىڭ كەيبىرىندە رەسەيلىكتەر مەن بەلارۋستىكتەرگە پاتەر جالعا بەرىلمەيتىنى جازىلعان.
Telegram مەسسەندجەرىندە رەسەيدەن كەتۋشىلەردىڭ ونداعان چاتى اشىلعان. ولارداعى ادام سانى 3 مىڭنان باستالىپ، 40 مىڭعا دەيىن جۋىقتايدى. ول جەردە بارعىسى كەلەتىن ەلگە بايلانىستى سۇراقتار قويىلىپ، ادامدار بىر-بىرىنە كەڭەس بەرىپ جاتادى.
پىكىر قالدىرۋ