ەكس-پرەزيدەنت نۇرسۇلتان نازاربايەۆقا تيەسىلى قورعا قارايتىن "جاسىل-جەر" كومپانياسى ەشقانداي باسەكەسىز تەندەر ارقىلى 6 جىلدا اقوردا، ۇكىمەت ءۇيى، مينيسترلەر ءۇيى، قارجى مينيسترلىگىنىڭ عيماراتى، تۇڭعىش پرەزيدەنت مۋزەيى جانە بەيبىتشىلىك كوشەسىندە ورنالاسقان اكىمشىلىك عيماراتتى كۇتىپ-ۇستاۋ مەن اباتتاندىرۋ جۇمىستارى ءۇشىن مەملەكەتتەن 7 ملرد 636 ملن تەڭگە العان. بۇل تۋرالى جۋرناليست ميات كاشىباي ءوزىنىڭ telegram كانالىندا جازدى.
ءجۋرناليستتىڭ ايتۋىنشا، مەكەمە بيىلعا 1 ملرد 530 ملن تەڭگەنىڭ تەندەرىن جەڭىپ العان. مەملەكەتتىك ساتىپ الۋ "ءبىر كوزدەن ساتىپ الۋ" ءتارتىبى بويىنشا، ياعني باسەكەسىز، اشىق كونكۋرسسىز جۇرگىزىلگەن.
"مەملەكەتتىك ساتىپ الۋ پورتالىنداعى اقپاراتقا قاراعاندا، 2021 جىلى 24 جەلتوقساندا پرەزيدەنتى ءىس باسقارماسىنا قاراستى "پرەزيدەنتتىڭ اكىمشىلىگى مەن ۇكىمەت اكىمشىلىك عيماراتتارى ديرەكسياسى" دەپ اتالاتىن كاسىپورىن "جاسىل-جەر" كومپانياسىمەن ەكى كەلىسىمشارت جاساستى. بىرەۋىنىڭ قۇنى 773 ملن، ەكىنشىسىنىكى 757 ملن. كەلىسىمشارتقا سايكەس، «جاسىل-جەر» ج ش س 2022 جىلى جوعارىدا اتالعان التى عيمارات اۋماعىنىڭ قارىن كۇرەپ، باۋ-باقشاسىن كۇتۋگە مىندەتتى.
ەكى تەندەر دە "ءبىر كوزدەن ساتىپ الۋ" ءتاسىلى بويىنشا وتكەن. ياعني، تاپسىرىس بەرۋشى اشىق كونكۋرس جاريالاماعان، تىكەلەي "جاسىل-جەر" كومپانياسىمەن كەلىسىمشارت جاساسقان" دەيدى جۋرناليست.
كەيىنگى التى جىلدا "پرەزيدەنتتىڭ اكىمشىلىگى مەن ۇكىمەت اكىمشىلىك عيماراتتارى ديرەكسياسى" كاسىپورىنى ءدال وسى "جاسىل-جەر" كومپانياسىمەن 23 كەلىسىمشارت جاساسقان. ولاردىڭ جالپى سومماسى – 7 ملرد، 636 ملن تەڭگە. "جاسىل-جەر" ج ش س بارلىعىندا تەندەردى "تىكەلەي ءبىر كوزدەن ساتىپ الۋ" ءتاسىلى ارقىلى العانى بەلگىلى بولدى.
"جىل سايىن پرەزيدەنت ءىس باسقارماسىنا قاراستى مەكەمەدەن ميللياردتاپ تەندەر الىپ وتىرعان "جاسىل-جەر" جشس-نىڭ قازاقستان ەكس-پرەزيدەنتى نۇرسۇلتان نازاربايەۆقا قاتىسى بار. قالاي دەيسىز بە؟ بايانداپ بەرەيىن. مۇقيات وقىڭىز، شاتاسىپ قالۋىڭىز مۇمكىن.
"جاسىل-جەر" ج ش س 2005 جىلى ساۋىردە قۇرىلعان. باستىپقىدا قۇرىلتايشىلارى جەكە ادامدار بولدى. ال 2012 جىلدان 2020 جىلعا دەيىن كومپانياعا نازاربايەۆتىڭ ءتۇرلى قورلارى يەلىك ەتتى. ناقتىراق ايتقاندا، 2012 جىلدان 2017 جىلعا دەيىن "فوند-ينۆەست" مۇلىك باسقارۋ ديرەكسياسى" دەگەن كومپانيا "جاسىل-جەر" جشس-نىڭ قۇرىلتايشىسى بولدى. ال بۇل كومپانيانىڭ قۇرىلتايشىسى – نازاربايەۆتىڭ "ەلباسى قورى" دەپ اتالاتىن قورى.
بۇدان كەيىن، 2017 جىلى نازاربايەۆتىڭ "ق ر تۇڭعىش پرەزيدەنتى – ەلباسىنىڭ قورى" دەگەن قورى بىرنەشە اي بويى "جاسىل-جەر" جشس-نىڭ قۇرىلتايشىسى بولدى. ال 2017 جىلدىڭ قىركۇيەگىنەن 2020 جىلدىڭ اقپانىنا دەيىن بۇل كومپانياعا "جىلجىمايتىن مۇلىكتى باسقارۋ جونىندەگى ديرەكسيا" ج ش س قۇرىلتايشىلىق ەتتى. بۇل ج ش س دا نازاربايەۆتىڭ "ەلباسى قورى" دەگەن قورىنا تيەسىلى.
قورىتا ايتقاندا "جاسىل-جەر" كومپانياسىنا سەگىز جىل بويى نازاربايەۆ يەلىك ەتتى. سول كەزەڭدە كومپانيا مەملەكەتتەن ميللياردتاعان تەندەر الىپ، قىرۋار پايدا تاپتى. ءتىپتى، "جاسىل-جەر" ج ش س نازاربايەۆ پرەزيدەنت بولىپ تۇرعان كەزدىڭ وزىندە دە پرەزيدەنت ءىس باسقارماسىنا قاراستى كاسىپورىننان تەندەر الىپ وتىردى. بۇل – نازاربايەۆتىڭ مەملەكەتتىك قىزمەتتە ءجۇرىپ تە بيزنەسپەن اينالىسقانىن دالەلدەيتىن بىردەن-بىر فاكت" دەيدى ول.
ميات كاشىبايدىڭ سوزىنشە، 2020 جىلدىڭ اقپانىنان باستاپ "جاسىل-جەر" كومپانياسىنىڭ قۇرىلتايشىسى جەكە ادامدار بولعان. سولاردىڭ ءبىرى – تىلەندى قۋعابايەۆ دەگەن ازامات. ول بۇل كومپانيانى بىرنەشە جىل باسقارادى، كەيىن قۇرىلتايشىسى دا بولدى. ءقازىر دە قۋعابايەۆ "Eco city group" دەگەن كومپانيا ارقىلى "جاسىل-جەر" جشس-عا يەلىك ەتىپ وتىر.
"اشىق دەرەكوزدەگى اقپاراتقا قاراعاندا، تىلەندى قۋعابايەۆ ءبىر كەزدەرى "قازاقستان رەسپۋبليكاسى پارلامەنتى شارۋاشىلىق باسقارماسىنىڭ قىزمەتتىك تۇرعىن ۇيلەردى پايدالانۋ جونىندەگى ديرەكسياسى" دەگەن مەملەكەتتىك كاسىپورىندى باسقارعان. الماتىداعى ايگىلى "الاتاۋ" ءساناتورييىنىڭ ديرەكتورى بولعان. بىلتىر ازاتتىق راديوسى بۇل دەمالىس ورىنىنا نازاربايەۆ يەلىك ەتەتىنىن انىقتاعان ەدى. سوعان قاراعاندا، تىلەندى قۋعابايەۆتى نازاربايەۆتىڭ سەنىمدى ادام دەپ توپشىلاۋعا نەگىز بار" دەپ جازادى جۋرناليست.
پىكىر قالدىرۋ