رەسەي پرەزيدەنتى ۆلاديمير ءپۋتيننىڭ باسپا ءسوز حاتشىسى دميتريي پەسكوۆ رەسەي ۋكرايناداعى اسكەري ماقساتتارىنىڭ ەشقايسىسىنا ءالى قول جەتكىزە الماعانىن مويىندادى جانە ماسكەۋدىڭ يادرولىق قارۋ قولدانۋ مۇمكىندىگىن جوققا شىعارۋدان باس تارتتى.
CNN ارناسىنىڭ ءتىلشىسى كريستيان امانپۋرعا اعىلشىن تىلىندە بەرگەن سۇحباتىندا پەسكوۆ رەسەي "ەكزيستەنسيالدى ءقاۋىپ" دەپ سانايتىن جاعدايلارعا قارسى كرەملدىڭ يادرولىق قارۋ قولدانۋ مۇمكىندىگىن جوققا شىعارۋدان بىرنەشە رەت باس تارتتى.
"پۋتين رەسەيدىڭ يادرولىق مۇمكىندىگىن قانداي جاعدايدا پايدالانادى؟" دەگەن سۇراققا پەسكوۆ "ەگەر بۇل ءبىزدىڭ ەل ءۇشىن ەكزيستەنسيالدى ءقاۋىپ بولسا، سولاي بولۋى (يادرولىق قارۋدى قولدانۋى) مۇمكىن" دەپ جاۋاپ بەردى.
پۋتين بۇعان دەيىن يادرولىق قارۋدى رەسەيگە ءقاۋىپ توندىرەتىن ەلدەرگە قارسى قولداناتىنىن ايتقان بولاتىن.
رەسەي پرەزيدەنتى اقپان ايىنداعى مالىمدەمەسىندە "ءبىزدىڭ جولىمىزعا كىم كەدەرگى جاساسا، ەلىمىز بەن حالقىمىزعا ءقاۋىپ توندىرسە، ولار رەسەي دەرەۋ جاۋاپ بەرەتىنىن جانە ونىڭ سالدارى بولاتىنىن ءبىلۋى كەرەك. بۇكىل تاريحتا ەشقاشان كورمەگەندەي سالدار بولادى" دەگەن.
رەسەي اسكەرلەرى ۋكرايناعا باسىپ كىرگەننەن بىرنەشە كۇن وتكەن سوڭ پۋتين ەلدىڭ ستراتەگيالىق يادرولىق كۇشتەرىن جوعارى دايىندىققا قويعانىن مالىمدەدى.
ال، پەنتاگون كرەمل باسپا ءسوز حاتشىسىنىڭ ۋكرايناداعى قاقتىعىس كەزىندە يادرولىق قارۋدى قولدانۋدان باس تارتۋىن ايىپتادى. رەسەي يادرولىق وقتۇمسىقتىڭ ەڭ كوپ قورىنا يە.
پەنتاگون وكىلى دجون كيربي ماسكەۋدىڭ يادرولىق قارۋدى قولدانۋ ىقتيمالدىعى تۋرالى ريتوريكاسىن "ءقاۋىپتى" دەپ اتادى.
"ءبىز مۇنى كۇن سايىن مۇمكىندىگىنشە قاداعالايمىز" دەپ قوستى ول.
اقش-تىڭ بۇرىنعى قورعانىس ءمينيسترى لەون پانەتتا دا پەسكوۆتىڭ سوزدەرىن سىنعا الدى.
"اشىعىن ايتقاندا، رەسەيگە قانداي دا ءبىر تۇردە ءقاۋىپ ءتونىپ تۇر دەگەن وتە جالعان تۇجىرىم. مەنىڭ ويىمشا، كەم دەگەندە، رەسەيدىڭ بۇل مۇمكىندىكتى قاراستىرىپ جاتقانى الاڭداۋشىلىق تۋدىرادى. مەن مۇنىڭ بولاتىن، بولمايتىنىن بىلمەيمىن. پۋتين ءالى دە اقش-تىڭ قالاي جاۋاپ بەرەتىنى تۋرالى الاڭداۋى كەرەك جانە ول ءوزىنىڭ امان قالۋ، قالماۋى تۋرالى الاڭداۋى كەرەك دەپ ويلايمىن" دەدى پانەتتا.
پىكىر قالدىرۋ