اقمولا وبلىسى سەلينوگراد اۋدانى قوياندى اۋىلىندا ەكىنشى ۇلىنىڭ قولىندا تۇراتىن كاماتان توقتامۇرات قىزى كەنشە بالاسى، 2021 جىلعى شىلدەدە جۇڭگو پوليسياسى تۇتقىنداپ الىپ كەتكەن عاراپا ناسيوللاۇلىنان 8 ايدان بەرى حابار الا الماي ءجۇر.

عاراپا ناسيوللا ۇلى قىتايداعى شىڭجاڭ ولكەسىنە تانىمال ءانشى، كومپوزيتور. ماماندىعى ادەبيەتشى ءمۇعالىم.

كاماتان توقتامۇرات قىزى ۇلى 2018 جىلدىڭ قىركۇيەك ايىنان بەرى گۋاڭ دۇڭ ولكەسىنىڭ جياڭ ميڭ قالاسىنداعى شىنجاڭ كلاسىنىڭ تاربيەشىسى بولىپ قىزمەت اتقارعانىن، بىلتىرعى شىلدە ايىنان بەرى سەگىز ايدان استام ۋاقىت بويى ۇلى تۋرالى ەشقانداي حابار الماعانىن ايتادى.

بالاسىن قايدا اكەتكەنى، نە كۇيدە ەكەنى، قايدا قامالعانى، نەندەي ۇكىم شىققانى بىلاي تۇرسىن، ەشكىم كورمەگەن، ەشكىم بىلمەيدى.

KazUnite.com سايتىنىڭ مالىمەتىنشى، عاراپا ناسيوللا ۇلى بەيجىڭدەگى ۇلتتار ۋنيۆەرسيتەتىنىڭ قازاق ءتىلى جانە ادەبيەتى فاكۋلتەتىن ءتامامداپ، 2012 جىلدان بەرى سانجى قالاسىنداعى وبلىستىق №2 ورتا مەكتەبىنىڭ ادەبيەت پانىنەن ساباق بەرگەن. 2018 جىلدىڭ قىركۇيەگىندە بيلىك ونى قىتايدىڭ گۋاڭ دۇڭ (Guang dong) دەپ اتالاتىن ىشكى ولكەسىندەگى جياڭمىن (Jiangmen) قالاسىنا جىبەرەدى. سوندا شىڭجاڭداعى از ساندى ۇلتتاردىڭ ۇزدىك وقۋشىلارىن جيناپ الىپ، قىتايشا وقىتىپ، تاربيەلەيتىن مەكتەپكە تاربيەشى-ۇستاز ەتىپ جىبەرەدى.

بالا جاستان ولەڭ، ءان جازاتىن عاراپا ناسيوللا ۇلى WeChat الەۋمەتتىك جەلىسىندە Suley دەگەن اتپەن بلوگ جۇرگىزگەن. وندا ادەبيەت، تاريح، مادەنيەت، مۋزىكا تاقىرىبىندا جازبالاردى جاريالاپ وتىرعان. ول جەردە قازاقتىڭ ۇلتتىق ونەرى مەن ادەبيەتى عانا ەمەس، قىتايدىڭ كلاسسيكالىق ادەبيەتى جايىندا دا جازىلىپ تۇرعان. عاراپا ول بلوگىندا 2400-دەن اسا شىعارما جاريالاعان. سونىمەن بىرگە ەكى رەت قازاق كومپوزيتورلارى مەن انشىلەرى قاتىسقان ءىرى كولەمدى ءان بايقاۋىن، ءبىر رەت اقىنداردىڭ جىر ءمۇشايراسىن وتكىزگەن. ءبىراق ولاردىڭ ەشقانداي دا ساياسي ماقساتى دا، ماعىناسى دا بولماعان.

باسىلىم عاراپا ناسيوللا ۇلىنىڭ ۇستىنەن 3 ءىس قارالىپ جاتقانىن جازدى. سونىڭ ىشىندەگى ەڭ اۋىر ءىس بويىنشا 3-5 جىلعا باس بوستاندىعىنان ايىرىلۋى مۇمكىن. قالعان ەكى ءىس بويىنشا قانداي شارا قولدانىلاتىنى ازىرگە بەلگىسىز. بۇل قانداي ىستەر ەكەنى دە اشىلىپ ايتىلماعان.