بۇگىن ق ر مادەنيەت جانە سپورت ءمينيسترى داۋرەن ابايەۆتىڭ توراعالىعىمەن وتكەن قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق ونوماستيكا كوميسسياسىنىڭ وتىرىسىندا كوميسسيا مۇشەلەرى قاپشاعاي قالاسىن قونايەۆ قالاسى دەپ قايتا اتاۋ تۋرالى ۇسىنىسقا وڭ قورىتىندى بەردى. بۇل تۋرالى مادەنيەت جانە سپورت مينيسترلىگى ءمالىم ەتتى.
جاقىن ارادا كوميسسيانىڭ قورىتىندىسى دايىندالىپ، زاڭناماعا سايكەس جۇمىس جۇرگىزۋ ءۇشىن الماتى وبلىسىنىڭ اكىمدىگىنە جولداناتىنىن حابارلاندى.
مينيسترلىك مالىمەتىنشە، قاپشاعاي قالاسىن قايتا اتاۋ تۋرالى باستامانى الماتى وبلىسىنىڭ ءبىرقاتار ۇكىمەتتىك ەمەس ۇيىمدارى ۇسىنعان. سودان كەيىن بۇل باستامانى قاپشاعاي قالاسى ءماسليحاتىنىڭ دەپۋتاتتارى ءبىراۋىزدان قولداپ، الماتى وبلىسىنىڭ ونوماستيكالىق كوميسسياسىنا جولداعان.
پرەزيدەنت ق.توقايەۆ 16 ناۋرىز كۇنگى جولداۋىندا الماتى وبلىسى ەكىگە ءبولىنىپ، جاڭادان الماتى جانە جەتىسۋ وبلىستارى قۇرىلاتىنىن، الماتى وبلىسىنىڭ ورتالىعى قاپشاعاي قالاسى، جەتىسۋ وبلىسىنىڭ ورتالىعى تالدىقورعان قالاسى بولاتىنىن ءمالىم ەتىپ، قوعام تاراپىنان قاپشاعاي قالاسىن قونايەۆ دەپ وزگەرتۋ ۇسىنىسى تۇسسە، ۇسىنىستى قولدايتىنىن جەتكىزگەن.
قعامدا باستامانى قولداۋشىلارمەن قاتار، وعان قارسى شىعۋشىلار دا بارشىلىق. قولداۋشىلار قاپشاعايدىڭ قالا رەتىندەگى قالىپتاسۋىنا دىنمۇحامەد قونايەۆتىڭ ەڭبەگى زور ەكەنىن ەسكەرىپ، باستاما وڭ دەسە، قارسى تاراپتاعىلار قۇرمەت كورسەتۋدىڭ وزگە دە ءتۇرى كوپ، قالانىڭ تاريحي اتاۋى قالعانى دۇرىس دەيدى.
پىكىر قالدىرۋ