بريتانيالىق GCHQ بارلاۋ قىزمەتىنىڭ باسشىسى دجەرەمي فلەمينگ جاڭا بارلاۋ دەرەكتەرى ۋكرايناداعى رەسەيلىك كەي ساربازدار بۇيرىقتى ورىنداۋدان باس تارتىپ، ءوز تەحنيكالارىن ءبۇلدىرىپ، ءتىپتى كەزدەيسوق وزدەرىنىڭ ۇشاقتارىنىڭ ءبىرىن اتىپ تۇسىرگەنىن كورسەتتى دەپ مالىمدەدى. بۇل تۋرالى Reuters جازدى.
– پۋتين سيتۋاسياعا باعا بەرۋدە قاتتى قاتەلەستى. ءبىز ءتىپتى كەڭەسشىلەرى پۋتينگە شىندىقتى ايتۋعا قورقىپ وتىر دەپ سانايمىز، – دەدى ول اۆستراليا ۇلتتىق ۋنيۆەرسيتەتىندەگى سوزىندە.
سونداي-اق ول جاڭا بارلاۋ دەرەكتەرى رەسەيلىك جاۋىنگەرلەردىڭ مورالدىق رۋحى تومەن، كەرەك-جاراقپەن قامتاماسىز ەتىلۋى ناشار بولعانى انىقتاعانىن اتاپ ءوتتى.
– ءبىز قارۋى، اسكەري رۋحى جوق رەسەيلىك جاۋىنگەرلەردىڭ بۇيرىقتى ورىنداۋدان باس تارتىپ، ءوز قارۋلارىن ءبۇلدىرىپ، ءتىپتى ۇشاقتارىن اتىپ تۇسىرگەنىن كوردىك، – دەيدى فلەمينگ.
رەسەيدىڭ قورعانىس مينيسترلىگى بولسا، قارۋلى كۇشتەرى پروفەسسيونال ەكەنىن، ۋكراينادا وزىنە جۇكتەلگەن مىندەتتى ءساتتى ورىنداپ جاتقانىن، باتىس رەسەيدىڭ جەڭىلگەنىن قالاپ وپەراسيا تۋرالى جالعان اقپارات تاراتىپ وتىرعانىن ايتادى.
اقش باعالاۋىنا ساي، رەسەيدىڭ نىساناعا ءدال تيەتىن زىمىراندارىنىڭ كەيبىرىنىڭ ىستەن شىعۋى 60 پايىزعا جۋىقتايدى.
اقش پەن ەۋروپانىڭ رەسمي تۇلعالارى سوعىستاعى رەسەيدىڭ جاعدايى اسا ءماز ەمەس ەكەنىن، باتىستىق سانكسيالاردىڭ جويقىن كۇشى بارىن ايتۋعا قورقاتىن كەڭەسشىلەرى ءپۋتيندى جاڭىلىستىرىپ وتىر دەيدى.
پىكىر قالدىرۋ