رەسەي شابۋىلىنان كييەۆ ىرگەسىندەگى بۋچا قالاسىندا كوپتەگەن بەيبىت تۇرعىنداردىڭ قازا تابۋىنا بايلانىستى رەسەيگە قارسى جاڭا، قاتاڭىراق سانكسيالار ەنگىزۋ تۋرالى ۇندەۋ ايتىلدى.

قالا كوشەلەرىنەن ازاماتتىق كيىم كيگەن كەمىندە 20 ادامنىڭ ءمايىتى تابىلعان. ۋكراينا رەسەيلىك اسكەرلەردى "ادەيى قىرعىن" جاسادى دەپ ايىپتادى.

ۋكراينا بيلىگىنىڭ حابارلاۋىنشا، رەسەي اسكەرلەرى ايماقتان شىعارىلعاننان كەيىن كييەۆتىڭ سىرتىنداعى قالالاردان جۇزدەگەن ءمايىت تابىلعان. ال رەسەي كىسى ءولتىرۋ جاعدايلارىن جوققا شىعارادى.

فرانسيا پرەزيدەنتى ەممانۋەل ماكرون رەسەيدىڭ كومىر مەن مۇناي ەكسپورتىنا باعىتتالعان سانكسيالاردى ودان ءارى كوبەيتۋگە شاقىردى. فرانسۋز باق-تارى سوعىس قىلمىستارىنىڭ انىق بەلگىلەرى بار ەكەنىن جازدى.

گەرمانيانىڭ قورعانىس ءمينيسترى كريستين لامبرەحت ەۋروپالىق وداق ەندى رەسەي گازىن يمپورتتاۋعا تىيىم سالۋدى تالقىلاۋى كەرەك دەيدى. ۋكراينانىڭ تالاپ ەتكەنىنە قاراماستان، تىيىم ەۋروپالىق تۇتىنۋشىلارعا اسەر ەتەتىندىكتەن، كوشباسشىلار تىيىمدى ءالى دە جاساعىسى كەلمەي تۇر.

اقش مەملەكەتتىك حاتشىسى ەنتوني بلينكەن كەز كەلگەن اسكەري قىلمىستار ءۇشىن جاۋاپتىلار جازالانۋى كەرەك ەكەنىن ايتتى. 

بلينكەن رەسەيلىك اسكەر گەنوسيد جاساعان، جاساماعانى تۋرالى سۇراققا جاۋاپ بەرىپ، حالىقارالىق سوت سياقتى ءتيىستى مەكەمەلەر مەن ۇيىمدار ادامزاتقا قارسى قىلمىستى تەرگەۋگە كۇش بىرىكتىرەتىنىن ايتتى.

بريتان پرەمەر-مينيسترى بوريس دجونسون وقيعانى "جەككورىنىشتى شابۋىلدار" دەپ اتاپ، ايىپتادى. سونداي-اق ۇلىبريتانيا وسى اپتادا جاڭا سانكسيالار جاريالاۋى مۇمكىن ەكەنى حابارلاندى.

بۇل رەتتە ەو كەڭەسىنىڭ ءتوراعاسى چارلز ميشەل ەو-نىڭ قوسىمشا سانكسيالارى دايىندالىپ جاتقانىن جەتكىزدى.