ق ر پرەزيدەنتىنە جانە ءبىرقاتار جوعارى لاۋازىمدى مەملەكەتتىك قىزمەتكەرلەرگە قاستاندىق جاساۋدى جوسپارلاعان دەلىنگەن ازاماتقا باينالىستى دەرەكتەر شىقتى. جۋرناليست ميحايل كوزاچكوۆتىڭ جازۋىنشا، كۇدىكتىدە شىنىمەن دە سنايپەرلىك ۆينتوۆكا بولعان.
"پرەزيدەنت پەن قۇقىققورعاۋ ورگانى قىزمەتكەرلەرىنە قاستاندىق جاساماق بولدى دەلىنگەن ىقتيمالدى تەرروريست تۋرالى. ونىڭ ءاتى-جونى ايان اتىعايەۆ، بيىلعى قاڭتاردان باستاپ ول استانادا ادۆوكات بولىپ جۇمىس ىستەگەن، دالىرەك ايتقاندا ليسەنزيا العان. بۇل جونىندە زاڭگەردىڭ تانىستارى بىلمەگەن. سنايپەرلىك ۆينتوۆكاسى شىنىمەن بولعان. ونى ەلگە بولشەكتەپ شىعىس ەۋروپا ەلدەرىنىڭ بىرىنەن اكەلگەن" دەيدى جۋرناليست Telegram كانالىندا.
اقپارات رەسمي ورگاندار تاراپىنان راستالعان جوق. ميحايل كوزاچكوۆ ءوزى ىستەيتىن "ۆرەميا" گازەتىندە سوت سالاسىنداعى زاڭسىزدىقتار، Telegram كانالىندا ءتۇرلى ينسايدەرلىك اقپاراتتار تۋرالى ءجيى جازادى. ادەتتە ونىڭ جازعاندارى ارتىنشا راس بولىپ شىعىپ جاتادى.
كەشە ۇقك 2022 جىلعى 25 ناۋرىزدا ۆەدومستۆوعا قاراستى قارسىبارلاۋ قىزمەتى نۇر-سۇلتان قالاسىندا ق ر پرەزيدەنتىنە جانە ءبىرقاتار جوعارى لاۋازىمدى مەملەكەتتىك قىزمەتكەرلەرگە قاستاندىق جاساۋدى جوسپارلاعان شەتەل بارلاۋ اگەنتى "ا"دەگەن ق ر ازاماتىن ۇستاعانىن حابارلاعان.
رەسمي اقپاراتقا قاراعاندا ول ءبىر مەزگىلدە ارناۋلى جانە قۇقىق قورعاۋ ورگاندارى قىزمەتكەرلەرىنە قاتىستى تەرروريستىك اكتىلەر جاساۋدى جوسپارلاعان. ءتىنتۋ بارىسىندا شەتەلدە شىعارىلعان دىبىس وشىرگىشى بار سنايپەرلىك ۆينتوۆكا، ەسىرتكى زاتتارى جانە ءىرى اقشا سوماسى تاركىلەندى. قارۋ قازاقستانعا كاسىبي جاسىرىلعان تۇردە بولشەكتەرمەن اكەلىنگەن.
ۇقك كۇدىكتى بۇدان وزگە قر-دا الەۋمەتتىك جەلىلەردە ءتيىستى ماتەريالداردى جاريالاۋ ارقىلى رەسەيگە قارسى ۇندەۋدى ناسيحاتتاۋ جانە قوعامدا رۋسوفوبتىق كوزقاراستاردى تۋدىرۋ تاپسىرمالارىن ورىنداعانىن، الدىن الا تەرگەۋ بارىسىندا ول جوعارىدا كورسەتىلگەن ىستەردى شەتەل مەملەكەتىنىڭ تاپسىرماسى جانە مۇددەسىندە جاساعانىن مويىنداعانىن ءمالىم ەتكەن.
الەۋمەتتىك جەلىدە ۇقك تاراتقان حابارلامانىڭ قيسىنىنا سەنە قويماعاندار، ونى قويىلىم دەپ سانايتىندار از بولمادى.
پىكىر قالدىرۋ