شىمكەنت قالاسى پوليسيا دەپارتامەنتى وزىندىك قاۋىپسىزدىك باسقارماسى دەپارتامەنت باسپا ءسوز قىزمەتىنىڭ بۇرىنعى باسشىسى ءمولدىر بەكەيەۆانىڭ سۋيسيد جاساۋعا ارەكەتتەنگەنىن راستادى.

سونداي-اق باسقارما بەكەيەۆا قوشتاسۋ حاتىندا جازعانداي، ونىڭ ۇستىنەن قىلمىستىق كودەكستىڭ 378-بابى 1-بولىگى (بيلىك وكىلىن قورلاۋ) بويىنشا قىلمىستىق ءىس قوزعالعانىن دا راستاپ، ءىستى قوزعاۋعا نە سەبەپ بولعانىن ءتۇسىندىردى.

"ناۋرىز ايىنىڭ سوڭىندا Youtube-كانالدا پد باسپا ءسوز قىزمەتىنىڭ جەتەكشىسى دەلىنگەن ادام پوليسيا قىزمەتكەرىنە بوعاۋىز ءسوز ايتىپ جاتقانى جازىلعان جازبا جاريالاندى. سوعان بايلانىستى شىمكەنت پد باسشىسى (قايرات دالبەكوۆ – رەد) سوتقا دەيىنگى تەكسەرىس تاعايىندادى. ناتيجەسىندە وزىندىك قاۋىپسىزدىك باسقارماسىنىڭ قىزمەتكەرلەرى باسپا ءسوز قىزمەتىنىڭ جەتەكشىسىمەن بولعان اڭگىمەنى جازىپ العان پوليسەيدى انىقتادى. قىزمەتكەر ءۇيىنىڭ جالعىز اسىراۋشىسى بولعاندىقتان، اڭگىمەنى ءوزىنىڭ جۇمىس ورنىن ساقتاپ قالۋ ماقساتىمەن بىلتىرعى جەلتوقساندا جازىلعانىن جەتكىزدى" دەلىنگەن حابارلامادا.

ءوقب پوليسەي وپەراتيۆتىك ورتالىق باسقارماسىنىڭ مامانى بولىپ جۇرگەن جەرىنەن پد-نىڭ بۇرىنعى باسشىسىنىڭ كومانداسى بويىنشا باسپا ءسوز حاتشىنىڭ قول استىنا جىبەرىلگەنىن ءمالىم ەتتى.

"بەكەيەۆا كۇندە جانجال شىعارىپ، بوعاۋىز سوزبەن پوليسەيدىڭ ار-نامىسىنا ءتيىپ، ءتىپتى جۇمىستان قۋىلاسىڭ دەپ قورقىتقان. سونىڭ سالدارىنان پوليسەي جازبانى WhatsApp ارقىلى دوستارىنا ءبولىسىپ، ءوزى مورالدىق، پسيحولوگيالىق قىسىمدى كوتەرە الماي اۋرۋحاناعا ءتۇسىپ قالعان. ونىڭ سوزدەرىن بەكەيەۆامەن 10 ايداي بىرگە ىستەگەن باسپا ءسوز قىزمەتىنىڭ قىزمەتكەرلەرى، كادر جۇمىستارىمەن اينالىسقان ماماندار، 5 جۇرگىزۋشى راستاپ وتىر" دەيدى باسقارماداعىلار.

باسقارما پوليسەي ارىزى بويىنشا بەكەيەۆانىڭ ۇستىنەن قىلمىستىق كودەكستىڭ 378-بابى 1-بولىگىنە (بيلىك وكىلىن قورلاۋ) ساي قىلمىستىق ءىس قوزعالعانىن، ال سۋيسيد جاساۋ ارەكەتىنە بايلانىستى قىلمىستىق كودەكستىڭ 105-بابى (ءوزىن-وزى ولتىرۋگە دەيىن جەتكىزۋ) بويىنشا قىلمىستىق ءىس قوزعالعانىن اتاپ ءوتتى.

بۇعان دەيىن شىمكەنت قالاسى پوليسيا دەپارتامەنتىنىڭ ەندى ەكس-رەسمي وكىلى ءمولدىر بەكەيەۆا دەپارتامەنتكە باسشى بولىپ كەلگەنىنە كوپ بولماعان قايرات دالبەكوۆتىڭ قىلمىستىق ىستەرىن جۇزەگە اسىرۋعا اتسالىسپاعانى ءۇشىن ونىڭ تاراپىنان قۋدالاۋعا ۇشىراپ، پسيحولوگيالىق قىسىم كورگەندىكتەن ءوز ەركىمەن جۇمىستان كەتىپ، وزىنە قول سالماق بولعانى حابارلانعان.

ول قوشتاسۋ حاتىندا قايرات دالبەكوۆ ەكس-پرەزيدەنت نۇرسۇلتان نازاربايەۆتىڭ قۇداسى، جەمقورلىق ارەكەتتەرىمەن اتى شىققانى تۋرالى ايتقان.

ءمولدىر بەكەيەۆا قازىرگى ۋاقىتتا جانساقتاۋ بولىمىندە كومادا جاتىر، جاعدايى تۇراقتى اۋىر.

دەرەككوز: كازتاگ