بۇگىن جالپى ءوتىرىستاماجىلىس دەپۋتاتتارىنىڭ وڭىرلەرگە ساپارى بارىسىندا تۇرعىنداردان كەلىپ تۇسكەن وتىنىشتەردى قاراۋ ناتيجەلەرى بويىنشا ۇكىمەتتىڭ اقپاراتىن تىڭدادى.

وسى ورايدا پرەمەر-مينيستردىڭ ورىنباسارى ەرالى توعجانوۆ باستاعان ءبىرقاتار ۇكىمەت مۇشەلەرى ارنايى كەلدى.

وتىرىستا ءماجىلىس ءتوراعاسى ەرلان قوشانوۆ مەملەكەت باسشىسى دەپۋتاتتاردىڭ  وڭىرلەردەگى وزەكتى الەۋمەتتىك ماسەلەلەردى شەشۋگە اتسالىسۋىن كۇشەيتۋ جونىندە تاپسىرما بەرگەنىن اتاپ ءوتتى.

دەپۋتاتتار ەلدىڭ بارلىق وڭىرىنە بارىپ، سايلاۋشىلارمەن 1600-گە جۋىق كەزدەسۋ وتكىزگەن. ولار ءتۇرلى الەۋمەتتىك نىسانداردا، كاسىپورىندار مەن بازارلاردا، شالعاي ەلدى مەكەندەردە بولىپ، ەڭبەك ۇجىمدارىنىڭ پروبلەمالارىمەن تانىستى. بارلىعى مىڭنان استام ماسەلە جيناقتالىپ، ۇكىمەتكە جىبەرىلدى. سونىڭ ىشىندە ازىق-تۇلىك پەن دارى-دارمەكتىڭ قىمباتتاۋى، اۋىز سۋمەن جانە تۇرعىن ۇيمەن قامتاماسىز ەتۋ، مەكتەپ قۇرىلىسى، جول جوندەۋ، ينتەرنەت ساپاسىن جاقسارتۋ ماسەلەلەرى بار.

ءماجىلىس ءتوراعاسىنىڭ ايتۋىنشا، پروبلەمالاردىڭ ءبارى ناقتى ءارى جۇيەلى تۇردە شەشىلۋگە ءتيىس. ولار دەپۋتاتتاردىڭ ءجىتى باقىلاۋىندا بولادى.

– ءاربىر ماسەلەنىڭ ارتىندا ادامداردىڭ تۇرمىسى مەن تاعدىرى تۇر. وسىنى ءار دەپۋتات، مينيستر مەن جەرگىلىكتى بيلىك وكىلدەرى تەرەڭ تۇسىنۋگە ءتيىس. ءقازىر ەلىمىز ۇلكەن وزگەرىستەردىڭ الدىندا تۇر. پرەزيدەنت ءىرى ساياسي رەفورمالار جاريالادى. ول رەفورمالار قارقىندى جۇزەگە اسا باستادى. ال ءبىز – پارلامەنت، ۇكىمەت، جەرگىلىكتى بيلىك، ءبارىمىز ءبىر كىسىدەي جۇمىلىپ، قوعامدا قوردالانعان ماسەلەلەردى شەشۋدە جەدەل ارەكەت ەتۋىمىز قاجەت. ءبىر سوزبەن ايتقاندا ءبىز مەملەكەت باسشىسىنىڭ قارقىنىنا ىلەسە ءبىلۋىمىز كەرەك، – دەدى ەرلان قوشانوۆ.

سونداي-اق پالاتا سپيكەرى پارلامەنت پەن ۇكىمەتتىڭ ماسەلەلەردى شەشۋ بويىنشا جاڭا فورماتتاعى جۇمىسى الداعى ۋاقىتتا دا جۇيەلى تۇردە جالعاساتىنىن ايتتى.

ءماجىلىستىڭ باسپا ءسوز قىزمەتى