سيفرلاندىرۋ: قازاقستان رەسەيلىك "سبەر"-مەن ەمەس، وتاندىق ماماندارمەن جۇمىس ىستەۋى مۇمكىن

/image/2022/04/08/crop-9_1_835x1484_mycollages.jpg
قازاقستانداعى سيفرلاندىرۋدى پلاتفورمالىق ۇلگىگە كوشىرۋدى وتاندىق ءىت-ماماندار جۇزەگە اسىرۋى مۇمكىن. بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين پرەزيدەنتتىڭ قابىلداۋى بويىنشا جازعان جازباسىندا ءمالىم ەتتى.
 
مۋسين پرەزيدەنتكە مينيسترلىكتىڭ بىلتىرعى اتقارعان جۇمىستارىنىڭ قورىتىندىسى، پرەزيدەنت تاپسىرمالارىنىڭ جۇزەگە اسىرىلۋى، سيفرلاندىرۋ جانە IT سالاسىنىڭ دامۋ پەرسپەكتيۆاسى جونىندە ەسەپ بەرگەنىن اتاپ ءوتتى.
 
ونىڭ ايتۋىنشا، بىلتىر ەڭ قاجەتتى 18 قۇجات سيفرلىق نۇسقاعا اۋىستىرىلعان. 2021 جىلى 628 ەلدى-مەكەندە ينتەرنەت ساپاسى جاقسارتىلسا، بيىل تاعى دا 140 اۋىلدا وسىنداي جۇمىستار جۇرگىزىلمەك.
 
– ءموبيلدى وپەراتورلارمەن بىرگە نۇر-سۇلتان، الماتى، شىمكەنت قالالارىندا 5G تەحنولوگياسىن سىناقتان ءساتتى وتكىزدىك. 2022 جىلى رەسپۋبليكالىق ماڭىزى بار قالالاردا، 2023-2024 جىلدارى وبلىس ورتالىقتارىندا كوممەرسيالىق ماقساتتا ىسكە قوسۋ جوسپارلانىپ وتىر، – دەدى ول.
 
 
مينيستر ءسوز سوڭىندا پرەزيدەنتكە سيفرلاندىرۋدىڭ پلاتفورمالىق ۇلگىسىنە وتۋدە تاجىريبەسى بار ساراپشىلاردى تارتا وتىرىپ، Govtech پلاتفورماسىن ۇلتتىق اقپاراتتىق تەحنولوگيالار اق جانە قازاقستاندىق ءىت-مامانداردىڭ كۇشىمەن قۇرۋدى ۇسىنعانىن ءمالىم ەتتى.
 
 
بىلتىر قازاقستان ۇكىمەتى ەلدەگى سيفرلاندىرۋدىڭ پلاتفورمالىق مودەلىن رەسەيلىك سبەر كومپانياسىنا جاساتۋ بويىنشا مەموراندۋمعا قول قويعان. ۇكىمەتتىك بۇل شەشىمى قوعامدا نارازىلىق تۋدىرىپ، سيفرلاندىرۋدى شەتەلدىك كومپانياعا جاساتۋ اقپاراتتىق قاۋىپسىزدىككە، اقپاراتتىق ەگەمەندىككە قاتەر توندىرەتىنى تۋرالى پىكىرلەر ايتىلعان. ەندى مىنە، مينيستر پلاتفورمانى قۇرۋدى وتاندىق ماماندارعا تاپسىرۋ تۋرالى ايتىپ وتىر.
قاتىستى تەگتەر :

قاتىستى ماقالالار