اۆستريا كانسلەرى كارل نەحاممەر ۋكرايناداعى سوعىس باستالعالى بەرى رەسەي پرەزيدەنتى ۆلاديمير پۋتينمەن كەزدەسكەن ءبىرىنشى ەۋرووداق باسشىسى بولدى. ۆۆس نەحاممەر ءپۋتيننىڭ ماسكەۋدەگى رەزيدەنسياسىندا وتكەن كەلىسسوزدەردى "تىك، اشىق جانە قاتال فورماتتا ءوتتى" دەپ سيپاتتاعانىن حابارلادى.
تابيعي گازدىڭ 80 پايىزىن رەسەيدەن الاتىن بەيتاراپ اۆستريا، ادەتتە، ەۋروپالىق وداقتىڭ وزگە مۇشەلەرىنە قاراعاندا ماسكەۋمەن تىعىز بايلانىستا.
"مەن پۋتينگە سوعىس اياقتالۋى كەرەك دەگەن ەڭ ماڭىزدى مەسسەدجدى جەتكىزگىم كەلدى. ويتكەنى سوعىستا جەڭگەندەر بولمايدى" دەيدى اۆستريا كانسلەرى مالىمدەمەسىندە.
ونىڭ ايتۋىنشا، ماسكەۋگە جاساعان ساپار دوستىق ساپار بولماعان.
نەحاممەر وكىلى كەزدەسۋ 75 مينۋتقا سوزىلعانىن، بۇل – ءپۋتيننىڭ ستاندارتتارى بويىنشا سالىستىرمالى تۇردە قىسقا ەكەنىن ايتتى.
نەحاممەر قاقتىعىستى توقتاتۋ نەمەسە گۋمانيتارلىق كومەكتەردى جاقسارتۋ جولدارىن ىزدەستىرۋدە ەشبىر كەدەرگى قالدىرماۋ ءۇشىن پۋتينمەن كەزدەسۋدى ءوزىنىڭ مىندەتى دەپ سانايتىنىن جەتكىزدى.
نەحاممەردىڭ پىكىرىنشە، پۋتينگە ونىڭ ۇستانىمى مەن كوزقاراسى وزگە ەلدەرمەن مۇلدە سايكەس كەلمەيتىنىن ءتۇسىندىرۋ كەرەك.
"(وعان ءتۇسىندىرۋ) ءبىر رەت ازدىق ەتەدى. ون رەت ازدىق ەتەدى. مۇنى (ءتۇسىندىرۋدى) 100 رەت جاساۋ كەرەك شىعار. مەنىڭ ويىمشا، ۋكراينادا بەيبىتشىلىك ورناپ، ادامدار ءقاۋىپسىز ءومىر ءسۇرۋى ءۇشىن ءبارىن جاساۋ كەرەك. مەيلى تەلەفونمەن، مەيلى بەتپە-بەت، ايتەۋىر پۋتينگە سوعىس تۋرالى شىندىقتى، ۋكراينادا بولىپ جاتقان ادىلەتسىزدىكتى ايتا بەرۋ كەرەك. بۇل جەردە پۋتينگە كرەمل قابىرعالارى سىرتىنداعى شىندىق قانداي ەكەنىن جەتكىزۋدە ءار ءۇنقاتۋ ماڭىزدى" دەيدى ول.
نەمىستىڭ Deutsche Welle باسىلىمى نەحاممەر كەزدەسۋ ناتيجەسى ءۇمىت ۇيالاتپاعانىن، رەسەي ۋكراينانىڭ شىعىسىنا جاپپاي شابۋىل جاساعالى وتىرعانى انىق ەكەنىن ءمالىم ەتكەنىن جازدى.
اۆستريا كانسلەرى پۋتينگە زەلەنسكيي كەلىسسوز جۇرگىزۋ ءۇشىن وزىمەن تىكەلەي بايلانىس ورناتۋعا نيەتتى ەكەنىن جەتكىزگەنىن، الايدا پۋتين ستامبۋل فورماتىنداعى كەلىسسوزدى قۇپ كورەتىنىن بىلدىرگەنىن اتاپ ءوتتى.
رەسەي تاراپى كەلىسسوز بارىسى تۋرالى اقپارات تاراتپادى.
پىكىر قالدىرۋ