رەسەيدە ناۋرىز ايىنان بەرى جۇمىس ىزدەۋگە ارنالعان HeadHunter جانە SuperJob سايتتارىندا كەلىسىم-شارتپەن اسكەري قىزمەتكە شاقىراتىن مىڭداعان حابارلاندىرۋ پايدا بولعان. ۆۆس رەسەي اتالعان حابارلاندىرۋلار ارقىلى ۋكرايناداعى سوعىسقا ادام ىزدەپ جاتقانىن انىقتاعان.
ءاتى-جونىن جاسىرۋدى قۇپ كورگەن ەكسپەرت ۆۆس-گە رەسەيدە ادەتتە كەلىسىم-شارتپەن قىزمەت ەتەتىن اسكەريلەردى ينتەرنەتتەگى حابارلاندىرۋ ارقىلى ەمەس، اسكەري كوميسسارياتتار ارقىلى الاتىنىن ايتقان. ونىڭ ءسوزىن HeadHunter سايتىنداعى دەرەكتەر دە راستايدى. سايتتاعى اسكەري قىزمەت تۋرالى 3 مىڭ حابارلاندىرۋدىڭ تۇگەلى سوڭعى ايدا جاريالانعان. الايدا سايت وكىلدەرى مۇنداي ۆاكانسيالار سايتتا بۇرىن دا جاريالانعانىن ءمالىم ەتكەن. الايلا ولاردىڭ سانى قازىرگىدەن ەداۋىر از.
تاعى ءبىر تانىمال Superjob سايتىندا ءبىر اپتادا اسكەري قىزمەتكە شاقىرعان 18 مىڭنان استام حابارلاندىرۋ شىققان. قورعانىس مينيسترلىگىنە قاتىسى بار سايتتا وسىعان ۇقساس 500 ۆاكانسيا جاريالانعان.
ۆۆس جۋرناليستەرى جۇمىس ىزدەپ جۇرگەن ادام بولىپ بىرنەشە حابارلاندىرۋدا كورسەتىلگەن نومەرلەرگە قوڭىراۋ شالعان. سويلەسۋشىلەردىڭ باسىم كوپشىلىگى اسكەري قىزمەت قايدا وتەتىنىن اشىپ ايتقىسى كەلمەگەن. تەك كەيبىرى عانا ۋكرايناعا اتتاناتىنىن، قۇجاتتاردى راسىمدەۋگە 1-2 اپتا كەتەتىنىن ايتقان.
اسكەري قىزمەت 3-6 ايدان 1 جىلعا دەيىن جالعاسۋى مۇمكىن ەكەنى، جالاقى مولشەرى حابارلاندىرۋلاردىڭ باسىم كوپشىلىگىندە 30-50 مىڭ رۋبل (شامامەن 150 - 250 مىڭ تەڭگە) اراسىندا بولاتىنى جازىلعان. اسكەري شەن مەن اتقاراتىن مىندەتكە بايلانىستى 210 مىڭ رۋبلدەن (1 ملن تەڭگەدەن استام) جوعارى جالاقى ۇسىنىلاتىنى تۋرالى دا حابارلاندىرۋلار بار.
ۆاكانسيالاردا نەگىزىنەن اسكەري بورىشىن وتەگەندەرگە باسىمدىق بەرىلگەن. اراسىندا اسكەردە بولماعانداردى دا قابىلدايتىنى تۋرالى، 9-سىنىپ بىتىرگەندەردى دە الاتىنىن جازعاندار دا كەزدەسكەن.
سوعىسقا كەلىسىم-شارت نەگىزىندەگى قىزمەتكەرلەردەن بولەك، ەرىكتىلەر دە الىنىپ جاتىر. جالپىرەسەي مەملەكەتتتىك تەليەۆيزيا جانە راديوتاراتۋ كومپانياسىنىڭ كوررەسپوندەنتى ءوزىنىڭ تەلەگرام كانالىندا ماسكەۋ وبلىسىندا ەرىكتىلەرگە 205 مىڭ رۋبل (1 ملن تەڭگەدەن استام) تولەنەتىنى، جارالانعاندارعا 3 ملن رۋبل (15 ملن تەڭگە)، قازا تاپقانداردىڭ وتباسىنا 8 ملن رۋبل (40 ملن تەڭگە) جانە گۋبەرناتوردان 5 ملن رۋبل (25 ملن تەڭگە)، بالالارىنا پاتەر بەرىلەتىنى تۋرالى جازعان.
رەسەي قورعانىس مينيسترلىگى اسكەردەگى ادام شىعىنى تۋرالى دەرەكتى سوڭعى رەت 25 ناۋرىزدا جاريالالاپ، 1351 اسكەري قىزمەتشىسىنەن ايىرىلعانىن حابارلاعان. ۋكراينا قورعانىس مينيسترلىگى 13 ساۋىردە جاريالاعان مالىمەتكە ساي، رەسەيدىڭ ادام شىعىنى 19،8 مىڭدى قۇرايدى. الايدا ۋنيان اگەنتتىگى بۇل سيفرعا جارالانعاندار دا كىرەتىنىن ناقتىلاعان.
پىكىر قالدىرۋ