سوڭعى كۇندەرى رەسەي كييەۆ ماڭىنداعى ءبىرقاتار جەڭىلىستەردەن كەيىن ۋكراينا استاناسىنان اسكەرىن شىعارىپ، ۇرىس قيمىلدارىن شىعىس ۋكرايناعا قاراي اۋداردى. BBC رەسەيدىڭ دونباس ايماعىنا قاراي ىعىسۋى ۇزاققا سوزىلعان قاقتىعىستى ءبىلدىرۋى مۇمكىن ەكەنىن حابارلادى.
پۋتين دونباسس تۋرالى ايتقاندا، ۋكراينانىڭ كومىر مەن بولات وندىرەتىن ەسكى ايماعى دەپ مەڭزەپ وتىر. ونىڭ شىن ماقساتى – وڭتۇستىكتەگى ءماريۋپولدىڭ سىرتىنان سولتۇستىك شەكاراعا دەيىن سوزىلاتىن ەكى ۇلكەن شىعىس وبلىستى، لۋگانسك پەن دونەسكتى تۇتاستىرۋ.
ناتو رەسەيلىك كۇشتەر دونەسكتىڭ وڭتۇستىك جاعالاۋىمەن قىرىمعا اپاراتىن قۇرلىق كوپىرىن قۇرۋعا تىرىسادى دەپ بولجايدى.
كورولدىك بىرىككەن قىزمەتتەر ينستيتۋتىنىڭ قىزمەتكەرى سەم كرەنني-ەۆانس: "ەڭ باستىسى، كرەمل ونى (دونباسستى - رەد) ۋكراينادان گورى رەسەيدىڭ ءورىستىلدى بولىگى رەتىندە انىقتاپ وتىر" دەيدى.
رەسەي كۇشتەرى ۋكراينانىڭ شىعىسىنا گۋمانيتارلىق اپات اكەلىپ، ءماريۋپولدى قيراندىعا اينالدىردى، ءبىراق ولار ۋكراينا اسكەرىن جەڭىلىسكە ۇشىراتا المادى.
رەسەيدىڭ قايتا شابۋىلعا دايىندالىپ جاتقانىنا بايلانىستى ۋكراينا پرەزيدەنتى ۆلاديمير زەلەنسكيي "ءبىز ءار ءبىر سۇيەم جەرىمىز ءۇشىن كۇرەسەمىز" دەپ انت ەتە جاۋاپ قاتتى.
