ورتالىق كوممۋنيكاسيالار قىزمەتىندە "ەكىنشى رەسپۋبليكا. ق ر پرەزيدەنتىنىڭ وكىلەتتىلىگى قالاي وزگەرەدى" تاقىرىبىمەن باسپا ءسوز جيىنى ءوتىپ، ادىلەت ءمينيسترى قانات مۋسين پرەزيدەنت قاسىم-جومات توقايەۆتىڭ بيىلعى جولداۋدا ايتقان پرەزيدەنتتىڭ جاقىن تۋىستارىنا ساياسي لاۋازىمدار مەن كۆازيمەملەكەتتىك قۇرىلىمداردى باسقارۋعا تىيىم سالۋ تۋرالى تاپسىرماسى قالاي جۇزەگە اسىرىلاتىنىن حابارلادى.

ءمينيستردىڭ ايتۋىنشا، زاڭناما بويىنشا جاقىن تۋىستار اتا-انالار، بالالار، اسىراپ الۋشىلار، اسىراپ الىنعاندار، اتا-اناسى ءبىر جانە اتا-اناسى بولەك اعا-ىنىلەرى مەن اپا-سىڭلىلەرى، اتاسى، اجەسى، نەمەرەلەرى جاتادى.

سونىمەن قاتار، سىبايلاس جەمقورلىققا قارسى ءىس-قيمىل تۋرالى زاڭناماعا سايكەس، ەرلى-زايىپتىلاردىڭ جاقىن تۋىستارى ءۇشىن شەكتەۋلەر بەلگىلەنگەن.

بۇدان بولەك پرەزيدەنت جارلىعىمەن ساياسي جانە اكىمشىلىك مەملەكەتتىك قىزمەتشىلەر لاۋازىمدارىنىڭ ءتىزىلىمى ايقىندالىپ، ولارعا مينيسترلەر، ولاردىڭ ورىنباسارلارى، اكىمدەر، مەملەكەتتىك ورگانداردىڭ باسشىلارى جانە باسقالار جاتقىزىلعان. بۇعان مەملەكەتتىك قاتىسى بار كۆازيمەملەكەتتىك ۇيىمدار دا وسى ساناتقا كىرەدى. ياعني، زاڭ كۇشىنە ەنگەن سوڭ پرەزيدەنتتىڭ اعاسى، اپكەسى، بالالارى "سامۇرىق قازىنا"، "بايتەرەك" سياقتى ۇيىمداردا باسشىلىق قىزمەتتەر اتقارا المايدى.

پرەزيدەنت بيىلعى جولداۋىندا سۋپەرپرەزيدەنتتىك جۇيەدەن باس تارتۋ ماسەلەسىن كوتەرىپ، تومەندەگىدەي ۇسىنىستاردى جاريالاعان:

♦ پرەزيدەنتتىڭ پارتياعا مۇشە بولۋىنا زاڭ جۇزىندە تىيىم سالۋ؛

♦ ورتالىق سايلاۋ كوميسسياسى ءتوراعاسى مەن مۇشەلەرى، ەسەپ كوميتەتى، كونستيتۋسيالىق كەڭەس مۇشەلەرى پارتيا قۇرامىنان شىعۋعا ءتيىس؛

♦ اكىمدەرگە پارتيا فيليالدارىن باسقارۋعا تىيىم سالۋ؛

♦ پرەزيدەنتتىڭ جاقىن تۋىستارىنا ساياسي لاۋازىمدار مەن كۆازيمەملەكەتتىك قۇرىلىمداردى باسقارۋعا تىيىم سالىنۋعا ءتيىس.