باس پروكۋراتۋرانىڭ ءبىرىنشى قىزمەت باستىعىنىڭ ورىنباسارى ەلدوس قيلىمجانوۆ ورتالىق كوممۋنيكاسيالار قىزمەتىندە وتكەن بريفينگتە قاڭتار وقيعاسى كەزىندە قيراتۋعا قاتىسقاندارعا 20-دان 100 دوللارعا دەيىن تولەنگەنى تۋرالى حابارلادى.
ەلدوس قيلىمجانوۆتىڭ سوزىنشە، الماتى وبلىسىندا "و" جانە "ن" ەسىمدى ازاماتتار تالدىقورعان قالاسىندا قيراتۋلار، ازاماتتاردىڭ مۇلىكتەرىن جويۋ جانە مەملەكەتتىك وبەكتىلەردى باسىپ الۋ قاتىسۋشىلارىن قارجىلاندىرعان.
– بۇل فاكتىلەر تەرگەۋ بارىسىندا انىقتالدى جانە جاپپاي تارتىپسىزدىكتەرگە قاتىسقانى ءۇشىن كۇدىكتەلگەن ادامداردىڭ جاۋاپتارىمەن راستالادى. جامبىل وبلىسىنىڭ تۇرعىنى 2022 جىلعى 4 قاڭتاردا الماتى قالاسىندا بولىپ، "تەلەگرامم" كانال اشىپ، وعان ساناۋلى ساعاتتاردا بىرنەشە مىڭ قاتىسۋشى جازىلدى. وسى تەلەگرامم كانال ارقىلى ونىڭ قاتىسۋشىلارى بارريكادالاردى قۇرۋ، "مولوتوۆا" كوكتەيلدەرىن دايىنداۋ جانە قۇقىق قورعاۋ قىزمەتكەرلەرىنە قارسىلىق ءبىلدىرۋ ءۇشىن تولىق نۇسقاۋلىق الىپ وتىرعان. كەيىن اعىمداعى جىلعى 5-6 قاڭتاردا اتالعان كانال ارقىلى قيراتۋشىلاردىڭ قوزعالىسى جانە ولاردىڭ جامبىل وبلىسىنىڭ مەملەكەتتىك وبەكتىلەرىنە جاساعان شابۋىلدارىن تۇزەتۋ تۋرالى اقپارات ءجۇردى. كۇدىكتى ادام انىقتالدى جانە ول قازىرگى ۋاقىتتا قاماۋدا. وسى وڭىردە "گازەل" اۆتوكولىگىنىڭ جۇرگىزۋشىسى "س" جانە ونىڭ جاقتاسى "ك" ەسىمدى ازاماتتار انىقتالدى. ولار اتالعان كولىكپەن ءجۇرىپ، الدىن الا دايىندالعان ارماتۋرانى، ۇرلانعان پوليسيانىڭ قالقاندارى مەن برونجيلەتتەرىن تاراتقان. سونداي-اق، قۇقىق قورعاۋ قىزمەتكەرلەرىنىڭ ءجۇرۋىن قيىنداتۋ ءۇشىن، ولار اۆتوكولىكتى جولداردى جابۋدا قولدانعان. قىلمىستىق ىستەردى تالداۋ ناتيجەلەرىمەن وسى قىلمىستاردى جاساۋدىڭ ۇقساس تاسىلدەرى قايعىلى وقيعالار بولعان باسقا وڭىرلەردە دە بايقالاتىنىن كورسەتتى. بۇل ءمان-جايلار ولاردىڭ ۇيلەستىرىلۋىن جانە ءبىرىڭعاي جوسپاردىڭ بولعاندىعىن كورسەتەدى، – دەدى ول.
ەلدوس قيلىمجانوۆ الماتى قالاسىندا ۇستالعان 4 كۇدىكتى الەۋمەتتىك جەلى ارقىلى ارماتۋرا كەسىندىلەرىن دايىنداۋ جانە قيراتۋشىلار ورنالاسقان جەرگە تاسىمالداۋ تۋرالى نۇسقاۋلار العانىن، قازىرگى ۋاقىتتا ولاردىڭ ۇيلەستىرۋشىلەرىن انىقتاۋ بويىنشا جۇمىستار جۇرگىزىلىپ جاتقانىن اتاپ ءوتتى.
پىكىر قالدىرۋ