ۆۆس ۋكرايناداعى سوعىسقا بايلانىستى رەسەيگە قارسى بۇرىن-سوڭدى بولماعان سانكسيالار سالىنىپ جاتقاندا رەسەيلىك مەكتەپتەردە سانكسيالاردىڭ پايداسى تۋرالى پروپاگاندا ءجۇرىپ جاتقانىن حابارلادى.

ناۋرىز ايىنىڭ سوڭىنان بەرى رەسەيلىك مەكتەپتەردە قوعامتانۋ ساباعىندا وقۋشىلارعا سانكسيانىڭ ەكونوميكانى جاڭعىرتۋعا تيگىزەر پايداسى، يمپورتتان ارىلۋعا اسەرى تۋرالى ۆيدەودارىستەر كورسەتىلىپ باستاعان.

ۆۆس-گە پىكىر بىلدىرگەن چيكاگو ۋنيۆەرسيتەتىنىڭ پروفەسسورى، ەكونوميست كونستانتين سونين رەسەي سانكسياعا ىلىنبەي تۇرىپ ەكونوميكاسىن يمپورتسىزداندىرۋعا تىرىسقاندا ولاردىڭ ايتقاندارىن اقتاۋعا بولاتىنىن، قازىرگى كەلتىرىپ وتىرعان ارگۋمەنتتەرى مەن ۆيدەودارىستەردەگى دەرەكتەر ناقتى ەمەس ەكەنىن، وعان سەنۋ قيىن ەكەنىن ايتادى.

– ەلەستەتىپ كورىڭىزشى. ءسىز دەنساۋلىعىڭىزعا كوڭىل بولمەيسىز، ارتىق سالماعىڭىز بار، تايىپ اياعىڭىزدى سىندىرىپ الدىڭىز. ەندى دۇرىس تاماقتانىپ، ترەناجەرلىك زالعا بارىپ، سول ارقىلى كۇشتى بولعىڭىز كەلەدى. ءتىپتى سولاي ىستەدىڭىز دەلىك. ەندى "اياعىمدى سىندىرىپ العانىم قانداي جاقسى بولدى" دەپ ايتار ما ەدىڭىز؟ مۇمكىن ايتارسىز. ءبىراق اياعىڭىزدى سىندىرماي تۇرىپ، دۇرىس تاماقتانىپ، ترەناجەرلىك زالعا بارعان بولساڭىز، اياق تا ساۋ، دەنساۋلىق تا مىقتى بولار ەدى، – دەپ رەسەيدىڭ ايتىپ جاتقان ءۋاجىن تۇسىندىرۋگە تىرىسقان ەكونوميست ەندىگى ۋاقىتتا رەسەيگە كىرمەي قالعان تاۋارلاردىڭ ورنىن، بۇرىن نارىقتا بولعان، ءبىراق ساپاسىنىڭ تومەندىگىنە بايلانىستى كوپشىلىك تۇتىنباعان تاۋارلار باساتىنىن اتاپ ءوتتى.