ەكس-پرەزيدەنت نۇرسۇلتان نازاربايەۆتىڭ نەمەرە ءىنىسى قايرات ساتىبالدىنىڭ بۇرىنعى ايەلى گۇلميرا ساتىبالدى ۋنيۆەرسيادا-2017 نىساندارىن جوندەۋگە باعىتتالعان قاراجاتتى ۇرلادى دەگەن كۇدىككە ءىلىندى. بۇل تۋرالى سىبايلاس جەمقورلىققا قارسى قىزمەت ءمالىم ەتتى.
"الماتى قالاسى بويىنشا سىبايلاس جەمقورلىققا قارسى قىزمەتى "الماتى قالاسى ەنەرگەتيكا جانە كوممۋنالدىق شارۋاشىلىق باسقارماسى" كمم لاۋازىمدى تۇلعالارى مەن "اريا-جاڭا استانا" ج ش س كومپانيا باسشىلىعىنا قاتىستى، ونىڭ ىشىندە گۇلميرا ساتىبالدىعا قاتىستى 2019 جىلى "الماتى قالاسىنداعى 2017 جىلعى ۋنيۆەرسيادا" نىساندارى ءۇشىن قۇرىلىس-مونتاج جۇمىستارىن ناقتى ورىندالماعان مىندەتتەر ءۇشىن تولەنگەن اسا ءىرى مولشەردە بيۋدجەت قاراجاتىن جىمقىرۋ فاكتىسى بويىنشا سوتقا دەيىنگى تەرگەۋ جۇرگىزىپ جاتىر. وسىعان ۇقساس اسا ءىرى كولەمدەگى بيۋدجەت قاراجاتىن جىمقىرۋ فاكتىلەرى بويىنشا مەملەكەتتىك ورگانداردىڭ لاۋازىمدى تۇلعالارى مەن "اريا-جاڭا استانا" ج ش س باسشىلىعىنىڭ قاتىسۋىمەن باسقا وڭىرلەردە سوتقا دەيىنگى تەرگەپ-تەكسەرۋلەر جۇرگىزىلۋدە. تەرگەۋلەر جالعاسىپ جاتىر" دەلىنگەن تاراتىلعان اقپاراتتا.
وزگە اقپارات تەرگەۋ مۇددەسى ءۇشىن جاريا ەتىلمەيتىنى حابارلاندى.
سىبايلاس جەمقورلىققا قارسى قىزمەت بۇعان دەيىن قايرات ساتىبالدىۇلىنا، ونىڭ بۇرىنعى جۇبايى گۇلميرا ساتىبالدىعا بيزنەستى رەيدەرلىك باسىپ الۋ فاكتىسى بويىنشا سوتقا دەيىنگى تەرگەۋ باستالعانىن جاريالاعان.
قايرات ساتىبالدى 13 ناۋرىز كۇنى، ونىڭ بۇرىنعى ايەلى 17 ناۋرىزدا قاماۋعا الىنعان.
