رەسەي قورعانىس مينيسترلىگى قۇرلىقارالىق بالليستيكالىق "سارمات" يادرولىق زىمىرانىنىنڭ ءساتتى ۇشىرىلعانى تۋرالى ۆيدەو كورسەتتى. ۆيدەونى ۆۆس ءوز سايتىنا جاريالادى.
اسكەريلەر رەسەي پرەزيدەنتى ۆلاديمير پۋتينگە تەلەديداردان زىمىراننىڭ سولتۇستىك-باتىستاعى پلەسەسكتەن ۇشىرىلعانىن جانە قيىر شىعىستاعى كامچاتكا تۇبەگىندەگى نىساناعا تيگەنىن ايتتى.
– جاڭا كەشەن ەڭ جوعارى تاكتيكالىق، تەحنيكالىق سيپاتتامالارعا يە جانە زىمىرانعا قارسى قورعانىستىڭ بارلىق زاماناۋي قۇرالدارىن ەڭسەرۋگە قابىلەتتى. ونىڭ الەمدە تەڭدەسى جوق، الداعى ۋاقىتتا دا (تەڭدەسى) بولمايدى. بۇل بىرەگەي قارۋ – شىن مانىندە ءبىزدىڭ قارۋلى كۇشتەرىمىزدىڭ جاۋىنگەرلىك الەۋەتىن نىعايتادى، رەسەيدىڭ سىرتقى قاتەرلەردەن قاۋىپسىزدىگىن سەنىمدى تۇردە قامتاماسىز ەتەدى جانە اگرەسسيۆتى ريتوريكا قىزىپ تۇرعان كەزدە، ءبىزدىڭ ەلىمىزگە ءقاۋىپ توندىرۋگە تىرىساتىنداردى ويلاندىرادى، – دەدى پۋتين.
سارسەنبىدە پەنتاگون (اقش) رەسەي سىناقتى ىسكە قوسۋ الدىندا ءتيىستى حابار جولداعانىن ايتتى. پەنتاگون بۇل سىناقتى "امەريكا قۇراما شتاتتارىنا ءقاۋىپ توندىرمەيتىن ادەتتەگى سىناق" دەپ سانايتىنىن جەتكىزدى.
اقش كونگرەسى زەرتتەۋ قىزمەتىنىڭ حابارلاۋىنشا، رەسەي ءاربىر زىمىرانعا 10 نەمەسە ودان دا كوپ وقتۇمسىق بار سارماتتى ورنالاستىرادى دەپ كۇتىلۋدە.
زىمىران بىرنەشە جىلدار بويى دامىتىلىپ كەلەدى، سوندىقتان ونىڭ سىناقتان ءوتۋى باتىس ءۇشىن كۇتپەگەن جاعداي ەمەس، دەگەنمەن بۇل جولعى سىناق رەسەيدىڭ ۋكرايناداعى سوعىسىنا بايلانىستى توتەنشە گەوساياسي شيەلەنىس ساتىندە بولدى.
پىكىر قالدىرۋ