كييەۆكە جاساعان قۇپيا ساپارىنان كەيىن اقش مەملەكەتتىك حاتشىسى ەنتوني بلينكەن رەسەي ۇرىس ماقساتتارىندا ساتسىزدىككە ۇشىراپ، ۋكراينا جەتىستىككە جەتىپ جاتقانىن ايتتى. بۇل تۋرالى CBS News باسىلىمى حابارلادى.
بلينكەن مەن اقش قورعانىس ءمينيسترى للويد ءوستيننىڭ ساپارى رەسەي ۋكرايناعا شابۋىل باستاعاننان بەرگى ەڭ جوعارى دەڭگەيدەگى كەزدەسۋ بولدى.
ولار ۋكراينا پرەزيدەنتى ۆلاديمير زەلەنسكييگە جانە ونىڭ كەڭەسشىلەرىنە اقش 300 ميلليون دوللاردان استام كولەمدە اسكەري كومەك، 165 ميلليون دوللارعا ءوق-دارى بەرەتىنىن ماقۇلدادى.
بلينكەن سونىمەن قاتار امەريكا ۋكراينا ۇكىمەتىنە تۇراقتى قولداۋ كورسەتەتىنىن مالىمدەدى. ونىڭ ايتۋىنشا، ۋكراينا پرەزيدەنتى ۆلاديمير زەلەنسكيي شەنەۋنىكتەرمەن كەزدەسۋىندە اقش پرەزيدەنتى دجو بايدەننىڭ باسشىلىعىنا جانە ۆاشينگتوننىڭ ۋكرايناعا دەگەن جومارتتىعىنا ريزاشىلىعىن بىلدىرگەن.
بلينكەننىڭ سوزىنشە، رەسەي ۋكراينانىڭ كەيبىر بولىكتەرىن قاتىگەزدىكپەن بومبالاۋدى جالعاستىرۋعا تىرىسادى. ول سونداي-اق ماسكەۋ ۇرىستارداعى بارلىق ماقساتتارىندا ساتسىزدىككە ۇشىراپ جاتقانىن، ال ۋكراينا جەڭىسكە جەتىپ جاتقانىن ايتادى.
بلينكەن "بۇل سوعىستىڭ قالعان بولىگى قالاي ءوربيتىنىن بىلمەيمىز، ءبىراق ەگەمەندى، تاۋەلسىز ۋكراينا پۋتين بيلىكتە وتىرعاننان الدەقايدا ۇزاعىراق ءومىر سۇرەتىنىن بىلەمىز. ءبىزدىڭ ۋكرايناعا قولداۋىمىز جالعاسادى جانە تۇپكىلىكتى تابىسقا جەتكەنشە جالعاسادى " دەدى.
پىكىر قالدىرۋ