اقش بارلاۋ مالىمەتتەرىن كييەۆكە بەرۋ ارقىلى ۋكراين كۇشتەرىنە رەسەيلىك گەنەرالداردى نىساناعا الۋعا جانە ولتىرۋگە كومەكتەسكەن، دەپ حابارلادى نيۋ-يورك تايمس گازەتى امەريكالىق جوعارى لاۋازىمدى شەنەۋنىكتەرگە سىلتەمە جاساپ.
گازەتتىڭ جازۋىنشا، اقش بارلاۋ قىزمەتىندە رەسەي اسكەرلەرىنىڭ قوزعالىسى تۋرالى مالىمەتتەر جانە ونىڭ ءموبيلدى اسكەري شتابىنىڭ ورنالاسقان جەرلەرى تۋرالى اقپاراتتار بار. بۇل اقپاراتتاردى ۋكراين كۇشتەرى شابۋىل كەزىندە پايدالانعان.
ۋكراين شەنەۋنىكتەرىنىڭ مالىمدەۋىنشە، جالپى شابۋىل كەزىندە رەسەيلىك 12 جوعارى دارەجەلى گەنەرال قازا تاپقان.
"رەسەيلىك اسكەردىڭ ناشار مورالدىق دەڭگەيى جوعارى دارەجەلى وفيسەرلەردى مايدان شەبىنە جاقىنداۋعا ءماجبۇر ەتتى" دەگەن بولجام بار.
نيۋ-يورك تايمسقا سۇحبات بەرگەن امەريكالىق شەنەۋنىكتەر شابۋىلداردىڭ قانشاسىنا اقش بارلاۋ قىزمەتى كومەكتەسكەنىن ناقتىلامادى.
اق ءۇيدىڭ باسپا ءسوز حاتشىسى نيۋ-يورك تايمستىڭ ماقالاسىن سىناپ، ونىڭ تاقىرىبى "ارانداتۋ" جانە "جاۋاپكەرشىلىكسىزدىك" دەپ مالىمدەدى.
اقش ۇلتتىق قاۋىپسىزدىك كەڭەسىنىڭ وكىلى ادريەن ۋوتسون ۆاشينگتون ۋكرايناعا "ءوز ەلىن قورعاۋ" ءۇشىن ۇرىس الاڭىندا بارلاۋ مالىمەتتەرىن بەرىپ جاتقانىن راستادى. الايدا ول مالىمەتتەردى بەرۋدە "رەسەيلىك گەنەرالداردى ءولتىرۋ نيەتى" بولماعانىن جەتكىزدى.
پىكىر قالدىرۋ