2022 جىلعى 1 ساۋىردەن باستاپ ايلىق ەسەپتىك كورسەتكىش 3 063 تەڭگەدەن 3 180 تەڭگەگە دەيىن جوعارىلادى. وسىعان بايلانىستى ەڭ تومەنگى كۇنكورىس دەڭگەيى، زەينەتاقى مەن جاردەماقى تولەمدەرىنىڭ مولشەرى وزگەرىسكە ۇشىرادى.
مەملەكەتتىك كىرىستەر كوميتەتىنىڭ مالىمەتىنشە، ەلدەگى قىمباتشىلىق دەڭگەيىنىڭ جوعارى بولۋىنا بايلانىستى 2022 جىلعا ينفلياسيا ءدالىزى 4-6%-دان 8-10%-عا دەيىن ۇلعايتىلعان.
"وسىعان بايلانىستى، 2022 جىلعى 1 ساۋىردەن باستاپ بارلىق الەۋمەتتىك تولەمدەردى ەسەپتەۋ ءۇشىن قولدانىلاتىن ايلىق ەسەپتىك كورسەتكىش 3 063 تەڭگەدەن 3 180 تەڭگەگە دەيىن جانە ەڭ تومەنگى كۇنكورىس دەڭگەيى 36 018 تەڭگەدەن 37 389 تەڭگەگە دەيىن ءوستى. وسىنى ەسكەرە وتىرىپ، 2022 جىلعى 1 ساۋىردەن باستاپ زەينەتاقى تولەمدەرى مەن جاردەماقىلاردىڭ مولشەرى قوسىمشا 4%-عا ارتتىرىلدى. جالپى العاندا 2022 جىلى زەينەتاقى تولەمدەرىنىڭ ءوسۋى الدىڭعى جىلعا قاراعاندا 11%-دى (ينفلياسيا دەڭگەيىنەن 2%-عا وزا وتىرىپ)، بازالىق زەينەتاقى تولەمى مەن جاردەماقىلاردىڭ ءوسۋى 9%-دى قۇرادى" دەلىنگەن كوميتەت حابارلاماسىندا.
ال ايىپپۇل مولشەرى وزگەرىسسىز قالماق. ايىپپۇل سانكسيالارى، سالىقتار جانە ق ر زاڭناماسىنا سايكەس باسقا دا تولەمدەر ءۇشىن جىل سوڭىنا دەيىن 2022 جىلعى 1 قاڭتاردان باستاپ بەلگىلەنگەن 3 063 تەڭگە مولشەرىندەگى ايلىق ەسەپتىك كورسەتكىش قولدانىلا بەرەدى.
پىكىر قالدىرۋ