بريتان اسكەري بارلاۋ قىزمەتىنىڭ مالىمدەۋىنشە، رەسەي ۋكرايناعا جىبەرگەن باسقىنشىلىق كۇشتەرىنىڭ ۇشتەن بىرىنەن ايىرىلعان بولۋى مۇمكىن. بۇل تۋرالى The Guardian باسىلىمى حابارلادى.
ۇلىبريتانيا قورعانىس مينيسترلىگىنىڭ اقپاراتىنشا، ۋكراينا شىعىسىنداعى ورىس اسكەرلەرى شابۋىل قارقىنىن جوعالتقان.
بەرليندە وتكەن ناتو سىرتقى ىستەر مينيسترلەرىنىڭ كەزدەسۋىندە ناتو باس حاتشىسى يەنس ستولتەنبەرگ ۋكراينانىڭ سوعىستا جەڭۋى ىقتيمالدىعى جوعارى ەكەنىن ايتتى.
رەسەيدىڭ باسقىنشىلىق شابۋىلىنا ۋكراينانىڭ قاتاڭ قارسىلىعى مەن لوگيستيكالىق ماسەلەلەر كەدەرگى كەلتىرگەن.
"رەسەيدىڭ ۋكرايناداعى سوعىسى ماسكەۋ جوسپارلاعانداي ءجۇرىپ جاتقان جوق. ولار كييەۆتى الا المادى، حاركوۆ توڭىرەگىندە كەرى شەگىنىپ جاتىر، دونباستاعى نەگىزگى شابۋىلى توقتاپ قالدى. رەسەي ستراتەگيالىق ماقساتتارىنا جەتە المادى" دەدى ستولتەنبەرگ.
ماسكەۋ ءۇشىن اسكەري ساتسىزدىكتەرگە قوسا، باسقىنشىلىقتىڭ تاعى ءبىر سالدارى بولدى. رەسەي ۋكرايناعا شابۋىل جاساعان سوڭ شۆەسيا مەن فينليانديا ناتو-عا قوسىلۋ تۋرالى رەسمي ءوتىنىش بەردى. بۇل ەلدەر ۇيىمعا قوسىلسا، ناتو مەن رەسەي اراسىندا 1300 شاقىرىمدىق ورتاق شەكارا پايدا بولادى.
رەسەي پرەزيدەنتى ۆلاديمير پۋتين ناتو-نى رەسەيدىڭ قاۋىپسىزدىگىنە قاتەر دەپ سانايدى. كەيبىر ساراپشىلار "پۋتين ۋكرايناعا ناتو-عا قوسىلۋىن توقتاتۋ ءۇشىن باسىپ كىردى" دەپ ەسەپتەيدى.
پىكىر قالدىرۋ