الماتى وبلىسىنىڭ اكىمشىلىك ورتالىعى بولعان قونايەۆ قالاسىندا 2025 پاتەرگە ارنالعان 59 كوپ قاباتتى ءۇي سالىنادى. بۇل تۋرالى قالا اكىمى نۇرلان قۇمابايەۆ QAPINFO جەلىلىك باسىلىمىنا ءمالىم ەتتى.
قالا اكىمىنىڭ ايتۋىنشا، قازىرگى تاڭدا جەكەمەنشىك مەردىگەر ەسەبىنەن 120 پاتەرگە شاقتالعان كوپقاباتتى ءۇش ءۇيدىڭ قۇرىلىسى ءجۇرىپ جاتىر. بۇدان بولەك 60 پاتەرلىك ونداعان ءۇيدىڭ جوباسى جاسالۋ ۇستىندە.
سونداي-اق كاسىپكەرلەر 2020-2023 جىلدار ارالىعىندا ءوز قاراجاتىنا 43 كوپقاباتتى ءۇيدى تۇرعىزادى دەپ جوسپارلانعان. ول جەردە 1125 شاڭىراق تۇرادى دەپ كۇتىلىپ وتىر.
"سونىمەن قاتار قالاداعى "سامال" جانە "ارداگەر" ىقشاماۋداندارىندا ينجەنەرلىك-كوممۋنالدىق جەلىلەردى تارتۋ بويىنشا جوبالىق-سمەتالىق قۇجاتتار ازىرلەنىپ جاتىر. بۇل –اتالعان ىقشاماۋدانداردا قوسىمشا تۇرعىن ۇيلەر بوي كوتەرەتىنىن بىلدىرەدى" دەلىنگەن اقپاراتتىق حابارلامادا.
نۇرلان قۇمابايەۆ قالا وبلىس ورتالىعى بولاتىنى جاريالانعالى قىمباتتاعان ءۇي باعاسى قۇرىلىس قارقىندى ءجۇرىپ، نارىقتاعى سۇرانىستى قامتاماسىز ەتىلەتىندىكتەن ارزاندايتىنىن ايتادى. سونداي-اق اكىم قازىرگى قىمباتشىلىق نەگىزسىز ەكەنىن، حالىقتىڭ قارجىلاي مۇمكىندىگى ءۇي قۇنىنىڭ تومەندەۋىنە اسەر ەتەتىنىن جەتكىزدى.
پىكىر قالدىرۋ