ەڭبەك جانە حالىقتى الەۋمەتتىك قورعاۋ مينيسترلىگى ەلەكتروندىق ەڭبەك بيرجاسىنا جاساعان ساراپتاما نەگىزىندە بۇرعىلاۋشىلار مەن IT سالاسىنىڭ ماماندارى جوعارى جالاقى الاتىنى انىقتالعانىن حابارلادى.
"ءساۋىر ايىنىڭ قورىتىندىسى بويىنشا بۇرعىلاۋ ەرىتىندىلەرى جونىندەگى ينجەنەرلەر مەن IT سالاسىنىڭ ماماندارى (ورتا ەسەپپەن – 1،7 ملن تەڭگە)، باسشىلار مەن توپ-مەنەدجەرلەر (~1 ملن تەڭگە) پوزيسيالارىنا ۇمىتكەرلەر، سونداي-اق باسقا دا جوعارى بىلىكتى تەحنيكالىق ماماندار (~800 مىڭ تەڭگە) ەڭ جوعارى جالاقى الادى دەپ كۇتىلەدى. سونىمەن قاتار جۇمىس بەرۋشىلەر ەڭ ۇلكەن جالاقىنى مەملەكەتتىك جانە كورپوراتيۆتىك سەكتور باسشىلارىنا (~900 مىڭ تەڭگە)، باس قۇرىلىسشىلارعا (~840 مىڭ تەڭگە)، ماكلەرلەرگە (~700 مىڭ تەڭگە)، بيزنەس-تالداۋشىلار مەن قوسىمشا ازىرلەۋشىلەرگە (~700 مىڭ تەڭگە) ۇسىنۋعا دايىن. ەڭ تومەنگى جالاقى كۇزەتشىلەرگە، جۇرگىزۋشىلەرگە، مۇعالىمدەرگە جانە ت. ب. ۇسىنىلادى" دەلىنگەن مينيسترلىك اقپاراتىندا.
2022 جىلعى ساۋىردە ەلەكتروندىق ەڭبەك بيرجاسىندا 91،3 مىڭ بوس جۇمىس ورنى جانە 59،5 مىڭ تۇيىندەمە ورنالاستىرىلعان. وتكەن ايمەن سالىستىرعاندا بوس ورىندار سانى 26%-عا، ال وزەكتى تۇيىندەمەلەر سانى 22%-عا وسكەن.
"سۇرانىسقا يە ءۇش ماماندىقتىڭ قاتارىنا ءداستۇرلى تۇردە كولىك جۇرگىزۋشىلەرى (4،6 مىڭ بوس جۇمىس ورنى)، قۇرىلىس جانە مونتاجداۋ جۇمىستارىنىڭ شەبەرلەرى (1،7 مىڭ بوس جۇمىس ورنى) جانە قاپتاۋشىلار (1،3 مىڭ بوس جۇمىس ورنى) كىرەدى. كۇزەتشىلەرگە، جۇك تيەۋشىلەرگە، مەديسينا قىزمەتكەرلەرىنە، تاربيەشىلەر مەن ولاردىڭ كومەكشىلەرىنە دە سۇرانىس جوعارى. وتكەن ايدا قوسالقى جۇمىسشىلار، بىلىكتىلىگى جوق جۇمىسشىلار جانە ەلدى مەكەندەردى اباتتاندىرۋ بويىنشا جۇمىسشىلار اراسىندا جۇمىس ورنى ءۇشىن باسەكەلەستىك ارتتى. سانى بويىنشا كوپ مامانداردىڭ قاتارىنا زاڭگەرلەر (535 تۇيىندەمەگە)، قازاندىق وپەراتورلارى (443 تۇيىندەمە)، ۆاحتەرلەر (676 تۇيىندەمەگە) جانە كوگالداندىرۋ جونىندەگى جۇمىسشىلار (306 تۇيىندەمەگە) كىردى" دەلىنگەن تاراتىلعان اقپاراتتا.
پىكىر قالدىرۋ