ۇلتتىق مۋزەي ديرەكتورى ارىستانبەك مۇحامەدي ۇلى جانساقتاۋ بولىمىنەن پالاتاعا اۋىستىرىلعان. بۇل تۋرالى مۋزەيدىڭ رەسمي وكىلى ايدار قىرىقباي مالىمدەدى، دەپ حابارلادى Tengrinews.kz سايتى.

– ول شامامەن ءبىر جارىم كۇن جانساقتاۋ بولىمىندە جاتقانىن بىلەسىزدەر. ءقازىر ول پالاتاعا اۋىستىرىلدى. جاعدايى ورتاشا. پالاتاسىنا ءالى ەشكىمدى كىرگىزبەيدى، تەك جۇبايىن. جالپى، دارىگەرلەر ونى قاراپ جاتىر. ءقازىر ومىرىنە ءقاۋىپ ءتونىپ تۇرعان جوق، –  دەدى قىرىقباي.

ول ارىستانبەك مۇحامەدي ۇلىنىڭ ۇستىنەن قىلمىستىق ءىس قوزعالماعانىن ايتتى.

– سىبايلاس جەمقورلىققا قارسى قىزمەت ۇلتتىق مۋزەيدىڭ باسشىلىق قۇرامىنا قاتىستى قىلمىستىق ءىس قوزعادى. وعان ديرەكتوردىڭ ورىنباسارلارى، بۇرىنعى ديرەكتورلار جانە ت.ب. كىرەدى. "التىن ادامنىڭ الەم مۋزەيلەرىنە شەرۋى" 2017 جىلى باستالدى. وسى ۋاقىت ىشىندە بىرنەشە ديرەكتور مەن ورىنباسار اۋىستى. تەكسەرىس بولعانىن جاسىرمايمىز. تەكسەرىسكە تۇڭعىشباي جامانقۇلوۆتىڭ شاعىمى (قازاقستاندىق اكتەر. – رەد.) نەگىز بولعان. ول مەملەكەت باسشىسىنىڭ اتىنا حات جازدى. وسىدان كەيىن بىزدە ەسەپ كوميتەتىنىڭ تەكسەرىسى بولدى. ولار ۇساق زاڭبۇزۋشىلىقتار تاپتى، ولاردىڭ ەسكەرتۋلەرىن ۇلتتىق مۋزەي ورىندادى. كەيىن باس پروكۋراتۋراعا قارجىلىق اۋديت شاعىمى بويىنشا تەكسەرىس جۇرگىزىلدى. وندا دا ۇساق ەسكەرتۋلەر ايتىلىپ، ولار تۇزەلدى. جامانقۇلوۆ ءۇشىنشى رەت حات جازدى. وندا مۇحامەديۇلىنى ءوزىن ايىپتاعان، – دەپ ءتۇسىندىردى ايدار قىرىقباي.